Photo by Threatpost.com
នៅក្នុងអត្ថបទនេះ យើងនឹងធ្វើការបង្ហាញតែសម្រាប់អ្នកប្រើ Zoom លើកុំព្យូទ័រដែលដំណើរការដោយប្រព័ន្ធប្រតិបត្តិការ Windows តែប៉ុណ្ណោះ។ ទោះជាយ៉ាងណា អ្នកប្រើ Zoom នៅលើទូរស័ព្ទដៃ និងប្រព័ន្ធប្រតិបត្តិការផ្សេងទៀត អាចព្យាយាមស្វែងរកមុខងារស្រដៀងគ្នានេះ នៅលើឧបករណ៍របស់ខ្លួនបាន។
ខាងក្រោមនេះជាវិធានសាមញ្ញៗដែលគួរអនុវត្តនៅពេលដែលអ្នកប្រើកម្មវិធី Zoom។
១. ធ្វើបច្ចុប្បន្នភាពកម្មវិធី
កម្មវិធី Zoom ត្រូវបានគេរកឃើញនូវចន្លោះប្រហោង និងចំណុចខ្សោយជាច្រើន ប៉ុន្តែគេក៏ទទួលស្គាល់ថា រាល់បញ្ហាទាំងនោះតែងត្រូវបានដោះស្រាយយ៉ាងលឿនផងដែរតាមរយៈការធ្វើបច្ចុប្បន្នភាពកម្មវិធីរបស់ខ្លួន។ ដូច្នេះ ចំណុចសំខាន់មួយក្នុងចំណោមចំណុចសំខាន់ផ្សេងទៀតគឺ ត្រូវប្រាកដថាអ្នកបានធ្វើបច្ចុប្បន្នភាពជាប្រចាំ និងកំពុងប្រើកម្មវិធី Zoom ជំនាន់ចុងក្រោយបង្អស់ ទាំងនៅលើទូរស័ព្ទ និងកុំព្យូទ័ររបស់អ្នក។
ដើម្បីធ្វើបច្ចុប្បន្នភាព សូមធ្វើការ Sign in ចូលទៅក្នុងកម្មវិធី Zoom ចុចលើ Profile របស់អ្នក > ជ្រើសរើស “Check for Updates”
២- ដាក់ពាក្យសម្ងាត់សម្រាប់ការប្រជុំ
ជារឿយៗ យើងតែងតែឃើញមានការចែករំលែកតំណភ្ជាប់នៃការប្រជុំតាម Zoom នៅលើ Facebook ឬគេហទំព័រណាមួយជាសាធារណៈនៅលើអ៊ីនធឺណិត។ ប្រសិនបើមានអ្នកណាម្នាក់ចុចលើតំណភ្ជាប់នោះ ពួកគេក៏អាចចូលទៅក្នុងបន្ទប់ប្រជុំរបស់អ្នកបានភ្លាម បើទោះបីជាមិនការអញ្ជើញឱ្យចូលរួមក៏ដោយ។ ការដាក់ពាក្យសម្ងាត់ គឺដើម្បីការពារបន្ទប់ប្រជុំរបស់អ្នក ដោយតម្រូវឱ្យអ្នកចូលរួមត្រូវតែវាយបញ្ចូលពាក្យសម្ងាត់ឱ្យបានត្រឹមត្រូវជាមុនសិន។
ដើម្បីដាក់ពាក្យសម្ងាត់ សូមបើកកម្មវិធី Zoom > ចូលទៅកាន់ Schedule > ធីកនៅលើ Passcode > Save
សូមធ្វើការចែករំលែកព័ត៌មានអំពីការប្រជុំ ដូចជា តំណភ្ជាប់នៃការប្រជុំ ឬលេខសម្គាល់បន្ទប់ប្រជុំ(Meeting Link or Meeting ID) និងពាក្យសម្ងាត់ តែចំពោះមនុស្សដែលត្រូវបានអញ្ជើញឱ្យចូលរួមតែប៉ុណ្ណោះ។ រាល់ការចែករំលែកព័ត៌មានសំខាន់ៗទាំងនេះ គួរធ្វើឡើងតាមរយៈកម្មវិធីទំនាក់ទំនងដែលមានសុវត្ថិភាព ដូចជាប្រើកម្មវិធី Signal ជាដើម។ល។
៣- បិទមុខងារដែលភ្ជាប់ពាក្យសម្ងាត់ ជាមួយនឹងតំណភ្ជាប់បន្ទប់ប្រជុំ
ពាក្យសម្ងាត់បន្ទប់ប្រជុំនឹងត្រូវបានភ្ជាប់ជាមួយនឹងតំណភ្ជាប់បន្ទប់ប្រជុំ ហើយប្រសិនបើអ្នកបើកមុខងារនេះឱ្យដំណើរការ នោះអ្នកចូលរួម នឹងអាចចូលរួមបាន ដោយគ្រាន់តែចុចនៅលើតំណភ្ជាប់ដែលអ្នកបានចែករំលែក ដោយមិនចាំបាច់វាយបញ្ចូលពាក្យសម្ងាត់នោះទេ។ ដើម្បីបិទមុខងារនេះ អ្នកត្រូវៈ
- ចូលទៅកាន់ https://zoom.us/profile/setting?tab=meeting
- អូសចុះក្រោម ស្វែងរក “Embed passcode in invite link for one-click join” អូសទៅឆ្វេង ដើម្បីបិទមុខងារនេះ។
- យើងក៏ណែនាំឱ្យអ្នកបើកមុខងារមួយ ដែលតម្រូវឱ្យអ្នកចូលរួមតាមទូរស័ព្ទ ត្រូវតែវាយបញ្ចូលពាក្យសម្ងាត់ផងដែរ ដោយចុចអូសទៅខាងស្តាំលើ “Require passcode for participants joining by phone”។
៤- បើកមុខងារ Waiting Room
ក្នុងនាមជាអ្នកដឹកនាំការប្រជុំ (Host) ត្រូវកំណត់ កុំអនុញ្ញាតឱ្យអ្នកចូលរួម អាចចូលទៅក្នុងបន្ទប់ប្រជុំបាន មុនពេលការប្រជុំចាប់ផ្តើម។ គ្រប់អ្នកចូលរួមត្រូវតែរង់ចាំ និងអាចចូលទៅក្នុងបន្ទប់ប្រជុំបានលុះត្រាតែទទួលបានការអនុញ្ញាតពីអ្នកដឹកនាំការប្រជុំ។
មុខងារ Waiting Room នេះ គឺជាការបន្ថែមសុវត្ថិភាពមួយជាន់ទៀតលើការដាក់ពាក្យសម្ងាត់ ដោយបន្ទាប់ពីអ្នកចូលរួមទទួលបានការអញ្ជើញ ទីមួយពួកគេត្រូវវាយបញ្ចូលពាក្យសម្ងាត់ឱ្យបានត្រឹមត្រូវសិន និងទីពីរពួកគេត្រូវរង់ចាំ រហូតដល់ទទួលបានការអនុញ្ញាតឱ្យចូលពីអ្នកដឹកនាំការប្រជុំ។
ការធ្វើបែបនេះ គឺអនុញ្ញាតឱ្យអ្នករៀបចំការប្រជុំ មានលទ្ធភាពអាចធ្វើការផ្ទៀងផ្ទាត់ និងពិនិត្យអ្នកចូលរួមប្រជុំម្តងម្នាក់ៗ ដើម្បីឱ្យច្បាស់ថា គ្មានជនប្លែកដែលមិនបានអញ្ជើញ អាចចូលក្នុងបន្ទប់ប្រជុំបាននោះទេ។ ដើម្បីបើកមុខងារនេះ អ្នកត្រូវបើកកម្មវិធី Zoom ជាមុនសិន > ចូលទៅកាន់ Schedule > ធីកនៅលើ Waiting Room > Save
៥- បើកមុខងារ ដែលអាចលុប ឬដកអ្នកចូលរួមណាម្នាក់ចេញពីការប្រជុំ
នៅពេលកំពុងប្រជុំ ប្រសិនបើមានសមាជិកណាម្នាក់ ធ្វើឱ្យរំខាន ឬបង្កបញ្ហាដល់ការប្រជុំទាំងមូល នោះអ្នកដឹកនាំការប្រជុំអាចមានសិទ្ធិក្នុងការដេញពួកគេចេញពីបន្ទប់ប្រជុំ ដោយអាចលុប (Remove) សមាជិកនោះចេញពីការប្រជុំបាន។
អ្នកអាចស្វែងរកមុខងារនេះបាន នៅពេលដែលអ្នកកំពុងប្រជុំ ដោយចូលទៅកាន់ Security ដែលនៅផ្នែកខាងក្រោម > បន្ទាប់មកចុចលើ “Remove Participant”។
សូមចាំថា សមាជិកដែលបានលុបចេញពីអង្គប្រជុំ មិនអាចត្រលប់ចូលរួមការប្រជុំនេះបានវិញទេ លុះត្រាតែមានការអនុញ្ញាតពីអ្នកដឹកនាំការប្រជុំ ដោយអ្នកដឹកនាំការប្រជុំត្រូវចូលទៅបើកមុខងារ ដែលអនុញ្ញាតឱ្យអ្នកដែលបានលុបចេញ អាចចូលរួមវិញបាន។
ដើម្បីបើកមុខងារនេះត្រូវចូលទៅកាន់ https://zoom.us/profile/setting > ស្វែងរក “Allow removed participants to rejoin” > អូសទៅខាងស្តាំដើម្បីបើកមុខងារនេះឡើងវិញ។
៦- ចាក់សោបន្ទប់ប្រជុំរបស់អ្នក
នៅពេលដែលការប្រជុំចាប់ផ្តើម ជាមួយនឹងវត្តមានគ្រប់គ្នាក្នុងបន្ទប់ប្រជុំ អ្នករៀបចំការប្រជុំអាចធ្វើការចាក់សោបន្ទប់ប្រជុំបាន ដើម្បីកុំឱ្យអ្នកផ្សេងអាចលួចចូលស្តាប់ការប្រជុំបាន។
មុខងារនេះអាចរកឃើញនៅពេលដែលអ្នកកំពុងប្រជុំ ដោយចូលទៅកាន់ Security នៅផ្នែកខាងក្រោម > ចុចលើ Lock Meeting
៧- បើកមុខងារមិនឱ្យមានការលួចថតពេលប្រជុំ
ដើម្បីចៀសវាងការលួចថត (Record) ការប្រជុំ អ្នកអាចបើកមុខងារដែលតម្រូវឱ្យអ្នកចូលរួម ត្រូវតែទទួលបានការអនុញ្ញាតជាមុន ពីអ្នកដឹកនាំការប្រជុំ ទើបពួកគេអាចធ្វើការ Record ការប្រជុំបាន។
- ដើម្បីបើកមុខងារនេះ អ្នកត្រូវ ចូលទៅកាន់ https://zoom.us/profile/setting?tab=recording
- អូសចុះក្រោម ស្វែងរក “Recording notifications – Zoom clients” ធីកលើ “Ask host to confirm before starting a recording” > Save
ទោះបីជាយ៉ាងណាក៏ដោយ ប្រសិនបើអ្នកចូលរួមនៅតែចង់ធ្វើការថតការប្រជុំ ពួកគេនៅតែមានវិធី ផ្សេងៗទៀតដដែល ដូចជា ថតវីឌីអូ ឬសំឡេងចេញពីកាមេរ៉ាទូរស័ព្ទ ឬដោយប្រើឧបករណ៍ថតផ្សេងៗទៀតរបស់ពួកគេ។ មុខងារនេះ គឺគ្រាន់តែមិនអនុញ្ញាតឱ្យអ្នកចូលរួមប្រើមុខងារថត ដែលមានស្រាប់នៅលើកម្មវិធី Zoom តែប៉ុណ្ណោះ។
ទោះបី Zoom ទទួលបានការពេញនិយមខ្លាំងពីអ្នកប្រើប្រាស់ ប៉ុន្តែវាក៏មានបញ្ហាច្រើនទាក់ទងសុវត្ថិភាពរបស់អ្នកប្រើប្រាស់ ហើយជាពិសេសជាងនេះទៅទៀត គេមានការបារម្ភខ្លាំងលើការ ការពារឯកជនភាព។ ប្រសិនបើអ្នកគិតពីបញ្ហាសុវត្ថិភាព និងឯកជនភាពខ្លាំង យើងសូមណែនាំកម្មវិធីមួយដែលមានឈ្មោះថា Jitsi ដែលកម្មវិធីនេះប្រើជំនួសកម្មវិធី Zoom បាន ហើយវាជាកម្មវិធីបើកចំហកូដ (Open Source)។ អ្នកអាចស្វែងយល់ពីកម្មវិធីនេះបន្ថែមនៅក្នុងអត្ថបទនេះ។ អ្នកទាំងអស់គ្នាអាចស្វែងយល់ពីកម្មវិធីសុវត្ថិភាពផ្សេងៗទៀតនៅក្នុងទំព័រ កម្មវិធីសុវត្ថិភាពរបស់យើង។
ប្រភពៈ