មុខងារថ្មីរបស់ Signal – Encrypted Group Calls

តាមរយៈគេហទំព័ររបស់ខ្លួន Signal បានបញ្ជាក់ថា មុខងារនេះគឺ អាចប្រើបានដោយសេរី សម្ងាត់ និងមានសុវត្ថិភាពខ្ពស់ជាមួយនឹងមុខងារកូដនីយកម្ម (end-to-end encrypted) ដែលដូចនឹងមុខងារផ្សេងៗទៀតដែលមាននៅលើ Signal។

ដើម្បីអាចខលជាក្រុមបាន អ្នកត្រូវចូលទៅកាន់ក្រុមណាមួយដែលមាននៅលើ Signal ជាមុនសិន បន្ទាប់មកអ្នកនឹងឃើញនិមិត្តសញ្ញា វីឌីអូខល នៅផ្នែកខាងលើនៃក្រុមនោះ។

នៅពេលដែលអ្នកចាប់ផ្តើមខល សមាជិកដែលមាននៅក្នុងក្រុម នឹងទទួលបានសារជូនដំណឹង (notification) ដើម្បីឱ្យសមាជិកទាំងអស់នៅក្នុងក្រុមដឹងថា អ្នកបានខលទៅកាន់ក្រុមទាំងមូល។

ពេលដែលអ្នកចាប់ផ្តើមខល Signal និងបង្ហាញសមាជិកដែលចូលរួមទាំងអស់ជាទម្រង់ក្រឡាចត្រង្គនៅលើអេក្រង់ អ្នកអាចអូសទៅឡើងលើដើម្បីបង្ហាញអ្នកដែលកំពុងនិយាយ។

ទោះបីជាយ៉ាងណាក៏ដោយ Signal បានបញ្ជាក់ថា ការហៅជាក្រុមនេះ ត្រូវបានកំណត់ចំនួនអ្នកចូលរួមចំនួន ៥ នាក់ប៉ុណ្ណោះ។ ក្រុមការងាររបស់ Signal កំពុងតែបន្តធ្វើការលើមុខងារនេះ ដើម្បីអនុញ្ញាតឱ្យ អាចទទួលអ្នកចូលរួមកាន់តែច្រើនបន្ថែមទៀត។

លក្ខខណ្ឌតម្រូវ៖

សមាជិកនៃក្រុមម្នាក់ៗ ត្រូវប្រើ Signal ជំនាន់ជំនាន់ចុងក្រោយគេបង្អស់នៅលើឧបករណ៍របស់ខ្លួន៖
- ទូរស័ព្ទ Android ចាប់ពីជំនាន់ v5.0.3 ឡើងទៅ
- ទូរស័ព្ទ iOS ចាប់ពីជំនាន់ v5.0.០ ឡើងទៅ
- កុំព្យូទ័រ ចាប់ពីជំនាន់ v1.39.2 ឡើងទៅ
- សមាជិកម្នាក់ៗត្រូវតែស្ថិតនៅក្នុងក្រុមថ្មី (Signal New Group) ដូចគ្នា
  Signal បែងចែកក្រុម (Group) ជាពីរធំៗគឺ New Group និង Legacy Group
- សមាជិកនៃក្រុមត្រូវបានកំណត់ចំនួនតែ៥នាក់ប៉ុណ្ណោះ