អត្តសញ្ញាណឌីជីថលៈ ភាពពិតជាក់ស្តែងនៃឯកជនភាពនៅលើអនឡាញ

“តើ​អ្នក​ចង់​ប្រើ​គណ​នី​ហ្វេស​ប៊ុក​ (Facebook) របស់​អ្នក​ដើម្បី​ចូល​ក្នុង​គេហ​ទំព័រ​នេះ​ទេ?”​ សំនួរ​ខាង​លើ​នេះ​តែង​តែ​លេច​ចេញ​ឡើង​នៅ​ពេល​អ្នក​ចង់​បង្កើត​គណនី​នៅ​ក្នុង​គេហទំព័រ​មួយ​ ឬ​ប្រើ​ប្រាស់​កម្មវិធី​ផ្សេងៗ​នៅ​លើ​អ៊ីន​ធឺ​ណិត។​

  

តើ​អ្នក​ឆ្ងល់​ដែរ​ឬ​ទេ​នៅ​ពេល​អ្នក​ភ្ជាប់​គណនី​ហ្វេស​ប៊ុក​របស់​អ្នក​ទៅ​នឹង​គេ​ហ​ទំព័រ​ទាំង​នោះ​ តើ​អ្នក​ប្រ​ឈម​មុខ​នឹង​បញ្ហា​អ្វី​ខ្លះ​? ​តើ​អ្នក​ដឹង​ទេ​ថា​ទិន្ន​ន័យ​ហ្វេស​ ប៊ុក​របស់​អ្នក​ត្រូវ​បញ្ជូន​ទៅ​កន្លែង​ណា​?​ ការ​សម្រេច​ចិត្ត​របស់​អ្នក​ក្នុង​ការ​ប្រើ​ប្រាស់​ទិន្ន​ន័យ​ក្នុង​ស្ថាន​ភាព​នេះ​ វា​បញ្ជាក់​ឲ្យ​យើង​ឃើញ​ថា​អ្នក​បាន​មើល​ស្រាល​នូវ​សិទ្ធិ​អំ​ណាច ​និង​ឯក​ជន​នៃ​អត្ត​សញ្ញាណ​ឌី​ជី​ថល​របស់​អ្នក​។

អ​ធិប​តេយ្យ​ភាព​ឌី​ជី​ថល​

នៅ​ក្នុង​យុ​គ​សម័យ​អ៊ីន​ធឺ​ណិត​អ​ធិប​តេយ្យ​ភាព​ឌី​ជី​ថល​គឺ​ជា​គោល​គំនិត​មួយ​ដ៏​សំខាន់​ដែល​មាន​ន័យ​ថា​បុគ្គល ​ឬ​ស្ថាប័ន​ត្រូវ​មាន​សិទ្ធិ​ក្នុង​ការ​គ្រប់​គ្រង​ទិន្ន​ន័យ​ឌី​ជី​ថល​របស់​ពួក​គេ​។ ​ម្យ៉ាង​វិញ​ទៀត​ អ​ធិប​តេយ្យ​ភាព​ឌី​ជី​ថល​ក៏​និ​យាយ​អំពី​ថា​តើ​ទិន្ន​ន័យ​ និង​ព័ត៏​មាន​ឌី​ជី​ថល​របស់​អ្នក​ត្រូវ​បាន​គ្រប់​គ្រង​និង​ថែ​រក្សា​យ៉ាង​ដូច​ម្តេច​?

អ្នក​ប្រើ​ប្រាស់​ជា​ទូ​ទៅ​ចូល​ចិត្ត​ក្នុង​ការ​យក​គ​ណ​នី​ហ្វេស​ប៊ុក ​ឬ​ជី​ម៉ែល (Gmail) ​ដើម្បី​ធ្វើ​ការ​ចុះ​ឈ្មោះ​ព្រោះ​វា​ងាយ​ស្រួល ​ដោយ​មិន​ចាំ​បាច់​បង្កើត​នូវ​គ​ណ​នី ​និង​លេខ​កូដ​សម្ងាត់​មួយ​ទៀត​ ហើយ​វា​ងាយ​ស្រួល​ចាំ ​និង​មិន​ខ្លាច​ភ្លេច​ និង​បាត់​គ​ណ​នី​ទាំង​នោះ​។​ ប៉ុន្តែ​ទង្វើ​បែប​នេះ​បាន​ក្លាយ​ជា​វិធី​សាស្ត្រ​ក្នុង​ការ​រក​ចំនូល​របស់​ក្រុម​ហ៊ុន​បច្ចេក​វិទ្យា​ធំៗ​ តាម​រយៈ​ការ​យក​ទិន្ន​ន័យ​និង​ព័ត៌​មាន​ឌី​ជី​ថល​នា​នា​ទៅ​លក់​ឬ​ជួញ​ដូរ ​តាម​រយះ​រូប​ភាព​ផ្សេងៗ​។​ ឧ​ទា​ហរណ៍​ក្រុម​ហ៊ុន​បច្ចេក​វិទ្យា​ធំៗ​ដូច​ជា​ក្រុម​ហ៊ុន​ហ្វេស​ប៊ុក ​ហ្គូគហ្គល (Google) ​និង​អា​ម៉ាហ្សូន (Amazon) ​ទទួល​បាន​ប្រាក់​កម្រៃ​តាម​រយៈ​ការ​លក់​ទិន្ន​ន័យ​របស់​អ្នក​និង​ការ​វិភាគ​ទិន្ន​ន័យ​របស់​អ្នក​ដើម្បី​ដឹង​ពី​ចំណង់​ចំណូល​ចិត្ត​របស់​អ្នក​ដើ​ម្បី​ឲ្យ​អ្នក​ទិញ​ផលិត​ផល ​ឬ​សេ​វា​កម្ម​នា​នា​នៅ​លើ​អ៊ីន​ធឺ​ណិត​។

សុ​វត្ថិ​ភាព​នៃ​អត្ត​សញ្ញាណ​ឌី​ជី​ថល​

អត្ត​សញ្ញាណ​របស់​យើង​គឺ​មាន​តំ​លៃ​ដែល​មិន​អាច​កាត់​ថ្លៃ​បាន​។ ​រាល់​ពេល​ធ្វើ​ដំណើរ​ទិញ​រថ​យន្ត​ ឬ​ប្រើ​ប្រាស់​សេ​វា​កម្ម​របស់​ធ​នា​គារ​ពួក​យើង​គ្រប់​គ្នា​តែង​តែ​ភ្ជាប់​សេ​វា​កម្ម ​និង​ផ​លិត​ផល​ទាំង​នោះ​ជា​មួយ​អត្ត​សញ្ញាណ​របស់​យើង​ជា​និច្ច​។​ ពួក​យើង​តែង​តែ​ការ​ពារ​អត្ត​សញ្ញាណ​របស់​យើង​ជា​និច្ច​។​ ផ្ទុយ​ទៅ​វិញ​យើង​ដូច​ជា​ធ្វេស​ប្រហែស​ជា​មួយ​នឹង​ការ​ចុះ​ឈ្មោះ​លេខ​កូដ​សម្ងាត់​ និង​ព័ត៌មាន​ផ្ទាល់​ខ្លួន​ដែល​ពួក​យើង​ប្រើ​ប្រាស់​នៅ​លើ​ប្រ​ព័ន្ធ​អន​ឡាញ​។

នៅ​ក្នុង​ខែ​ធ្នូ​ ឆ្នាំ​២០២០ ​អ​ធិ​ការ​ប​តី​អា​ល្លឺ​ម៉ង់​លោក​ស្រី​អ៊េន​ ជី​ឡា​មីក​គែល (Angela Merkel) ​បាន​និ​យាយ​អំ​ពី​សារៈសំ​ខាន់​នៃ​សុវត្ថិភាព​នៃ​អត្ត​សញ្ញាណ ​ឌី​ជី​ថល​នៅ​ឯ​អង្គ​ប្រ​ជុំ​មួយ​ដែល​មាន​ការ​ចូល​រួម​ពី​ក្រុម​ហ៊ុន​ឯក​ជន​ធំៗ​។ បន្ថែមពី​នេះ​ទៀត​រដ្ឋា​ភិ​បាល​អូ​ស្ត្រា​លី ​និង​កា​ណា​ដា​បាន​អនុវត្ត​កម្ម​វិធី​អត្ត​សញ្ញាណ​ឌី​ជី​ថល​ដែល​បង្កើត​ឡើង​ក្នុង​គោល​បំណង​ដើម្បី​បង្កើត​អត្ត​សញ្ញណ​ឌី​ជី​ថល​ទៅ​ឲ្យ​ពល​រដ្ឋ​របស់​ពួក​គេ​ និង​បង្កើត​ក្នុង​ការ​តំរូវ​ឲ្យ​ក្រុម​ហ៊ុន​ឯក​ជន​ធំៗ​គិត​ពី​សុវត្ថិភាព​អត្ត​សញ្ញាណ​ឌី​ជី​ថល​របស់​អ្នក​ប្រើ​ប្រាស់​។

ព្រំ​ដែន​ថ្មី​នៃ​អត្ត​សញ្ញាណ​ឌី​ជី​ថល​

ក្នុង​កំឡុង​ពេល​នៃ​ការ​រីក​រាល​ដាល​នៃ​ជម្ងឺ​កូវីត​១៩​នេះ ​ឥ​រិ​យា​បទ​នៅ​លើ​ប្រព័ន្ធ​អន​ឡាញ​ជា​ច្រើន​ត្រូវ​បាន​ផ្លាស់​ប្តូរ​។​ទំនាក់​ទំនង​ក្នុង​ការ​រស់​នៅ​ ការ​ធ្វើ​ការ​ងារ​ត្រូវ​បាន​ផ្លាស់​ប្តូរ​ទៅ​ធ្វើលើ​ប្រព័ន្ធ​អន​ឡាញ​។​ទាំង​នេះ​បាន​សរ​បញ្ជាក់​ឲ្យ​យើង​ឃើញ​ថា​សុវត្ថិភាព​នៃ​អត្ត​សញ្ញាណ​ឌី​ជី​ថល​មាន​សារះ​សំខាន់​ខ្លាំង​ណាស់​។

បន្ថែម​ពី​នេះ​ទៀត​ក្នុង​ឆ្នាំ​២០២០​ការ​គំរាម​កំហែង​នៅ​លើ​ទិន្ន​ន័យ​ និង​ប្រ​ព័ន្ធ​ព័ត៏​មាន​បច្ចេក​វិទ្យា​មាន​ការ​កើន​ឡើង​ជា​គំហុក​ក្នុង​នោះ​រួម​មាន​ការ​រំ​លោភ​បំ​ពាន​ និង​ការ​លួច​ទិន្ន​ន័យ​ចំនួន​៣៦០​លាន ​ដែល​បាន​កើត​ឡើង​នៅ​លើ​អ៊ីន​ធឺ​ណិត​។​           ជាលទ្ធផល​ បញ្ហា​នេះ​បាន​ក្រើន​រំ​លឹក​ដល់​ក្រម​ហ៊ុន​ និង​អង្គ​ភាព​ទាំង​អស់​អំ​ពី​សារះ​សំខាន់​ក្នុង​ការ​បង្កើន​នូវ​សុវត្ថិ​ភាព​គ្រប់​គ្រង​ទិន្ន​ន័យ​ដើម្បី​ធ្វើ​ការ​ការ​ពារ​អត្ត​សញ្ញាណ​ឌី​ជី​ថល​។

សរុប​រួម​មក​ព្រំ​ដែន​ថ្មី​នៃ​ការ​ការ​ពារ​អត្ត​សញ្ញាណ​គឺ​ផ្តោត​សំ​ខាន់​នៅប្រ​ព័ន្ធ​ឌី​ជី​ថល​។​ឧ​ទា​ហរណ៍​ ធា​នា​សុវត្ថិ​ភាព​ក្នុង​ការ​ចូល​ទៅ​ទិន្ន​ន័យ ​សុវត្ថិ​ភាព​ប្រ​ព័ន្ធ​ព័ត៏​មាន​បច្ចេក​វិទ្យា​ និង​សុវត្ថិ​ភាព​ក្នុង​ដំណើរ​ការ​គ្រប់​គ្រង​អត្ត​សញ្ញាណ​។

ប្រភពៈ https://securityboulevard.com/2021/04/digital-identity-the-reality-of-online-privacy/