ការតម្រូវឲ្យប្រើគណនី Microsoft អនឡាញនៅក្នុង Windows 11 មានន័យថា កុំព្យូទ័ររបស់អ្នកកំពុងបម្រុងទុកសោអ៊ីនគ្រីបទិន្នន័យ ទៅក្នុងអនឡាញដោយស្វ័យប្រវត្តិ ហើយ Microsoft និយាយថា ខ្លួននឹងប្រគល់សោទាំងនោះទៅ FBI ប្រសិនបើមានការបញ្ជាតាមច្បាប់។
កុំព្យូទ័រ Windows នឹងបម្រុងទុកសោអ៊ីនគ្រីបរបស់ខ្លួនទៅក្នុងអនឡាញ ហើយ Microsoft នឹងចែករំលែកសោទាំងនោះជាមួយ FBI ប្រសិនបើមានការស្នើសុំ។
Microsoft បានបញ្ជាក់ក្នុងសេចក្តីថ្លែងការណ៍មួយទៅកាន់ទស្សនាវដ្តី Forbes ថា ក្រុមហ៊ុននឹងផ្តល់ឱ្យ FBI អាចចូលទៅកាន់សោអ៊ីគ្រីប BitLocker ប្រសិនបើមានការបញ្ជាតាមច្បាប់ដែលមានសុពលភាព។ សោទាំងនេះអនុញ្ញាតឲ្យអាចដោះសោសម្ងាត់ (decrypt) និងចូលប្រើទិន្នន័យនៅលើកុំព្យូទ័រដែលដំណើរការ Windows ដោយផ្តល់ឱ្យអាជ្ញាធរអនុវត្តច្បាប់នូវមធ្យោបាយក្នុងការអាចចូលទៅកាន់ឧបករណ៍ និងចូលប្រើទិន្នន័យរបស់អ្នកប្រើប្រាស់បាន។
ព័ត៌មាននេះកើតឡើងបន្ទាប់ពី Forbes រាយការណ៍ថា Microsoft បានផ្តល់សោអ៊ីនគ្រីប BitLocker ទៅ FBI ដើម្បីចូលប្រើឧបករណ៍មួយនៅកោះ Guam ដែលអាជ្ញាធរជឿថាមាន “ភស្តុតាងដែលអាចជួយបញ្ជាក់ថា បុគ្គលដែលគ្រប់គ្រងកម្មវិធីជំនួយសម្រាប់អត់ការងារធ្វើពាក់ព័ន្ធនឹង Covid នៅលើកោះនោះ មានការចូលរួមក្នុងផែនការលួចថវិកា” នៅដើមឆ្នាំ 2025។
រឿងនេះអាចកើតឡើងបាន ព្រោះឧបករណ៍នោះបានរក្សាទុកសោអ៊ីនគ្រីប BitLocker របស់ខ្លួននៅលើអនឡាញ។ តាមលំនាំដើម Windows 11 បង្ខំឲ្យប្រើគណនី Microsoft ហើយប្រព័ន្ធប្រតិបត្តិការ (OS) នឹងភ្ជាប់សោអ៉ីនគ្រីប BitLocker របស់អ្នកទៅគណនីអនឡាញរបស់អ្នកដោយស្វ័យប្រវត្តិ ដើម្បីឲ្យអ្នកប្រើអាចស្តារទិន្នន័យបានយ៉ាងងាយស្រួល ប្រសិនបើពួកគេត្រូវបានចាក់សោចេញពីឧបករណ៍។
អ្នកអាចបិទមុខងារនេះ និងជ្រើសរើសរក្សាទុកសោនៅក្នុងឧបករណ៍ ដោយមិនភ្ជាប់អ៊ីនធឺណិត (local) បាន ប៉ុន្តែគេរចនាវាឡើង ដើម្បីរក្សាទុកសោនៅលើអនឡាញរបស់ Microsoft នៅពេលភ្ជាប់កុំព្យូទ័រជាមួយគណនី Microsoft។
លោក Charles Chamberlayne អ្នកនាំពាក្យ Microsoft បាននិយាយក្នុងសេចក្តីថ្លែងការណ៍ទៅកាន់ Forbes ថា៖
“ខណៈដែលការស្តារសោផ្តល់ភាពងាយស្រួល វាក៏មានហានិភ័យនៃការចូលប្រើដែលមិនចង់បានផងដែរ ដូច្នេះ Microsoft ជឿថា អតិថិជនស្ថិតនៅក្នុងទីតាំងល្អបំផុតក្នុងការសម្រេចចិត្ត… អំពីរបៀបគ្រប់គ្រងសោរបស់ពួកគេ។”
ពិនិត្យមើលថាតើសោអ៉ីនគ្រីប BitLocker របស់កុំព្យូទ័រអ្នក ត្រូវបានរក្សាទុកនៅលើអនឡាញរបស់ Microsoft ឬអត់
Microsoft បានប្រាប់ Forbes ថា ខ្លួនទទួលបានប្រហែល ២០ សំណើក្នុងមួយឆ្នាំពី FBI សម្រាប់យកសោអ៊ីនគ្រីប BitLocker ប៉ុន្តែភាគច្រើននៃសំណើទាំងនោះមិនអាចបំពេញបានទេ ព្រោះសោអ៊ីនគ្រីប មិនដែលត្រូវបានរក្សាទុកនៅលើអនឡាញរបស់ក្រុមហ៊ុន។
រឿងនេះគួរឲ្យចាប់អារម្មណ៍ ព្រោះក្រុមហ៊ុនបច្ចេកវិទ្យាផ្សេងៗដូចជា Apple មានប្រវត្តិបដិសេធមិនផ្តល់អាជ្ញាធរចូលប្រើទិន្នន័យដែលបានអ៊ីនគ្រីបនៅលើផលិតផលរបស់ខ្លួន។ Apple បានប្រយុទ្ធផ្លូវច្បាប់ជាមួយ FBI កាលពីអតីតកាល នៅពេលត្រូវបានស្នើឲ្យបង្កើតច្រកខាងក្រោយ (backdoor) ចូលទៅ iPhone មួយ។ ក្រុមហ៊ុនធំៗផ្សេងទៀតដូចជា Meta ក៏រក្សាទុកសោអ៊ីនគ្រីបនៅលើប្រព័ន្ធអនឡាញរបស់ខ្លួនដែរ ប៉ុន្តែប្រើស្ថាបត្យកម្ម zero-knowledge និងអ៊ីនគ្រីបសោនៅកម្រិតម៉ាស៊ីនមេ (server-side) ដើម្បីឲ្យមានតែអ្នកប្រើប៉ុណ្ណោះអាចចូលប្រើបាន។
ជាក់ស្តែង វាគួរឲ្យភ្ញាក់ផ្អើលដែលសោអ៊ីនគ្រីបដែលត្រូវបានរក្សាទុកនៅលើ Microsoft មិនត្រូវបានអ៊ីនគ្រីបនៅលើប្រព័ន្ធអនឡាញផងដែរ។ ប្រសិនបើអ៊ីនគ្រីប នោះវានឹងរារាំង Microsoft មិនឲ្យមើលឃើញសោទាំងនោះបាន ប៉ុន្តែបើតាមស្ថានភាពបច្ចុប្បន្ន សោទាំងនេះមានស្ថានភាពមិនអ៊ីនគ្រីប ហើយវាជាអន្តរាយធំចំពោះឯកជនភាពរបស់អតិថិជន។
ការមើលឃើញ Microsoft ប្រគល់សោទៅកុំព្យូទ័រ Windows ដែលបានអ៊ីនគ្រីបយ៉ាងងាយស្រួលបែបនេះ គឺជារឿងគួរឲ្យព្រួយបារម្ភ ហើយគួរឲ្យអ្នកទាំងអស់ដែលប្រើកុំព្យូទ័រ Windows សម័យទំនើប គិតម្តងទៀតមុននឹងបម្រុងទុកសោរបស់ពួកគេទៅក្នុងប្រព័ន្ធអនឡាញរបស់ក្រុមហ៊ុន។ អ្នកអាចពិនិត្យមើលថាតើកុំព្យូទ័រណាខ្លះដែលមានសោ BitLocker រក្សាទុកនៅលើម៉ាស៊ីនមេ Microsoft តាមរយៈគេហទំព័រគណនី Microsoft ហើយអ្នកអាចលុបសោទាំងនោះចេញបាន ប្រសិនបើវាមាន។
ប្រភព៖ windowscentral.com