ថ្ងៃទី១៤ ខែតុលា ឆ្នាំ២០២៥ ក្រុមហ៊ុន Microsoft នឹងបញ្ចប់ការគាំទ្រ ឬលែងធ្វើបច្ចុប្បន្នភាព (Update) ជាផ្លូវការសម្រាប់ Windows 10។ នេះគឺជាកាលបរិច្ឆេទដ៏សំខាន់ សម្រាប់អ្នកប្រើប្រាស់ដែលពឹងផ្អែកលើប្រព័ន្ធប្រតិបត្តិការនេះ អស់រយៈពេលជាច្រើនឆ្នាំ គឺរាប់ចាប់ពីថ្ងៃទី ២៩ ខែកក្កដា ឆ្នាំ២០១៥ កន្លងមក។
ការធ្វើបច្ចុប្បន្នភាពប្រព័ន្ធប្រតិបត្តិការ និងកម្មវិធី តែងតែត្រូវបានណែនាំមុនគេ ពេលនិយាយពីសុវត្ថិភាពឧបករណ៍ ឬសុវត្ថិភាពឌីជីថល។ នៅពេលដែលការគាំទ្រត្រូវបានបញ្ចប់ ឬឈប់ធ្វើបច្ចុប្បន្នភាព នោះសុវត្ថិភាពរបស់ឧបករណ៍ ដែលដំណើរការជាមួយ Windows 10 នឹងរងផលប៉ះពាល់យ៉ាងខ្លាំង។
ប្រព័ន្ធប្រតិបត្តិការ វាប្រៀបដូចជាធុង សម្រាប់ផ្ទុកកម្មវិធីផ្សេងៗ ដែលបានដំឡើងចូលទៅក្នុងកុំព្យូទ័រអញ្ចឹង បើមិនមានប្រព័ន្ធប្រតិបត្តិការ (Operating System) នោះអ្នកក៏មិនអាចដំឡើងកម្មវិធីផ្សេងៗចូលក្នុងកុំព្យូទ័របានទេ។ ប៉ុន្តែបើប្រព័ន្ធប្រតិបត្តិការមានបញ្ហា នោះកម្មវិធី និងទិន្នន័យគ្រប់បែបយ៉ាងនៅក្នុងកុំព្យូទ័រក៏មិនមានសុវត្ថិភាពដែរ។
បន្ទាប់ពីក្រុមហ៊ុន Microsoft ឈប់ធ្វើបច្ចុប្បន្នភាព ភាពងាយរងគ្រោះដែលបានរកឃើញថ្មីៗនៅក្នុង Windows 10 នឹងមិនត្រូវបានជួសជុលឡើយ។ ពួកឧក្រិដ្ឋជនតាមអ៊ីនធឺណិត នឹងធ្វើការវាយប្រហារលើចន្លោះប្រហោង ដែលពួកគេបានរកឃើញ បញ្ចូនមេរោគផ្សេងៗដើម្បីតាមដាន លួចទិន្នន័យសំខាន់ៗ បំផ្លាញឯកសារ នឹងប្រើកុំព្យូទ័រដែលរងគ្រោះនោះ ដើម្បីយកទៅវាយប្រហារអ្នកផ្សេងៗទៀតដែលពាក់ព័ន្ធ ដែលអាចបង្កបញ្ហាជាច្រើនដល់ឧបករណ៍ដែលអ្នកកំពុងប្រើ អ្នកពាក់ព័ន្ធ និងថែមទាំងអាចប៉ះពាល់ដល់ដំណើរការរបស់ស្ថាប័ន ឬអាជីវកម្មទាំងមូលផង។
សម្រាប់អ្នកប្រើប្រាស់ ឬស្ថាប័នដែលកំពុងប្រើ Windows 10 កំណែបច្ចុប្បន្ន គឺ22 H 2 (Version 22H2) នឹងក្លាយជាកំណែចុងក្រោយនៃប្រព័ន្ធប្រតិបត្តិការ Windows 10 ហើយក្រុមហ៊ុន Microsoft នឹងនៅតែបន្តធ្វើបច្ចុប្បន្នភាពប្រចាំខែ រហូតដល់កាលបរិច្ឆេទកំណត់ចុងក្រោយ នៅក្នុងខែតុលា ឆ្នាំ២០២៥នេះ។ ដើម្បីធានាបាននូវការការពារប្រឆាំងនឹងការគំរាមកំហែង តាមអ៊ីនធឺណិត អ្នកប្រើប្រាស់ Windows 10 គួរពិចារណា ធ្វើការផ្លាស់ប្តូរទៅប្រើ Windows 11 ឱ្យបានមុនកាលបរិច្ឆេទដែលបានកំណត់នេះ។ គួររំលឹកថា ការប្រើកម្មវិធីដែលលែងទទួលបានការធ្វើបច្ចុប្បន្នភាព និងការប្រើកម្មវិធីផ្សេងៗដែលមិនមានអាជ្ញាប័ណ្ណ (Pirated / Cracked Software) ប្រៀបដូចជាការបើកច្រកទ្វារ ឱ្យឧក្រិដ្ឋជនវាយប្រហារ បញ្ចូនមេរោគ លួចយកព័ត៌មាន ទិន្នន័យ ដែលធ្វើឱ្យប៉ះពាល់ដល់សុវត្ថិភាពឌីជីថលធ្ងន់ធ្ងរ។ ប្រសិនបើអ្នកជាស្ថាប័នមិនស្វែងរកប្រាក់ ចំណេញ និងមានអាជ្ញាប័ណ្ណត្រឹមត្រូវ អ្នកអាចបញ្ជាទិញកម្មវិធី ពីគេហទំព័រ TechSoup Cambodia ដែលជាស្ថាប័ន ដែលធ្វើការបញ្ចុះតម្លៃកម្មវិធីកុំព្យូទ័រជាច្រើន ដល់ស្ថាប័នមិនស្វែងរកប្រាក់ចំណេញទាំងនោះ។
ប្រភព៖