ការបោកបញ្ឆោតក្នុងទម្រង់ វិនិយោគក្លែងក្លាយ (Pig Butchering Scam) គឺជាការបោកបញ្ឆោតផ្នែកហិរញ្ញវត្ថុដ៏ស្មុគស្មាញ ដែលជនបោកប្រាស់ ព្យាយាមកសាងទំនុកចិត្តពីជនរងគ្រោះតាមរយៈមិត្តភាពក្លែងក្លាយ ឬទំនាក់ទំនងស្នេហាក្លែងក្លាយ បន្ទាប់មកក៏បញ្ចុះបញ្ចូលជនរងគ្រោះឱ្យវិនិយោគក្នុងគម្រោងក្លែងក្លាយ។ អត្ថបទនេះរៀបរាប់ពីរបៀបដែលការបោកបញ្ឆោតនេះដំណើរការ សញ្ញាដែលត្រូវប្រុងប្រយ័ត្ន និងគន្លឹះដើម្បីការពារខ្លួនពីការបោកបញ្ឆោតដែលបណ្តាលឱ្យខាតបង់ច្រើននេះ។
តើអ្វីទៅជាការបោកបញ្ឆោតបែប វិនិយោគក្លែងក្លាយ?
ការបោកប្រាស់បែបវិនិយោគក្លែងក្លាយ (Pig Butchering) កើតមានឡើងដំបូងនៅអំឡុងឆ្នាំ 2016 ចេញពីប្រទេសចិន ដោយដើមឡើយ ជនឆបោកកំណត់គោលដៅជនរងគ្រោះពីគេហទំព័រណាត់ជួបរបស់អ្នកស្រលាញ់ភេទដូចគ្នា (same-sex dating sites)។ ការឆបោកនេះបានរីករាលដាលខ្លាំងដំបូងនៅតំបន់អាស៊ីអាគ្នេយ៍ ពិសេសក្នុងពេលដែលមានការរីករាលដាលនៃជំងឺកូវីដ១៩ ហើយក្រោយមកវាក៏បាន រីករាលដាលពាសពេញពិភពលោក។
Pig Butchering មានន័យថា ការចិញ្ចឹមជ្រូកបំប៉នយកសាច់ ដោយគេប្រៀបធៀបជនរងគ្រោះទៅនឹងសត្វជ្រូក (Pig) ហើយអ្នកឆបោកជាម្ចាស់ជ្រូក។ របៀបនៃការឆបោកនេះ អ្នកឆបោកប្រើពេលយូរល្មមធ្វើការទាក់ទង កសាងទំនុកចិត្តជាមួយជនរងគ្រោះ មុននឹងពួកគេបោកប្រាស់ប្រាក់ជនរងគ្រោះ ដែលប្រៀបបាននឹង ម្ចាស់ជ្រូកត្រូវប្រើពេលវេលាច្រើនគួរសម ដើម្បីចិញ្ចឹម ថែបំប៉នជ្រូកឱ្យធំធាត់ មុននឹងពួកគេលក់ទៅឱ្យឈ្មួញ ឬកាប់យកសាច់លក់។
ការបោកបញ្ឆោតបែប វិនិយោគក្លែងក្លាយ (Pig Butchering) ជាការបោកបញ្ឆោតហិរញ្ញវត្ថុដែលប្រើប្រាស់បច្ចេកទេសវិស្វកម្មសង្គម (social engineering) រួមផ្សំនឹងបច្ចេកវិទ្យាដូចជា បញ្ញាសិប្បនិម្មិត (AI)ជាដើម។ ការឆបោកនេះអ្នកឆបោក ធ្វើឡើងតាមរយៈការបង្កើតមិត្តភាពក្លែងក្លាយ ឬទំនាក់ទំនងស្នេហា លើកម្មវិធីបណ្តាញសង្គម កម្មវិធីផ្ញើសារ និងវេទិកាណាត់ជួបផ្សេងៗ ដើម្បីបង្កើតទំនាក់ទំនង ហើយក្រោយមកនាំទៅរកការកេងប្រវ័ញ្ចផ្នែកហិរញ្ញវត្ថុ។ ជនរងគ្រោះត្រូវបានគេធ្វើឱ្យជឿលើឱកាសវិនិយោគដែលទទួលបានប្រាក់ចំណេញច្រើន ក្នុងរយៈពេលខ្លី។
ការឆបោកតាមនេះ និងការឆបោកតាមអនឡាញមួយចំនួនទៀត ភាគច្រើនធ្វើឡើងជាប្រព័ន្ធ ក្នុងទ្រង់ទ្រាយធំ ដោយពាក់ព័ន្ធនឹងការចាប់ជំរិត និងការជួញដូរមនុស្ស បង្ខំឱ្យធ្វើការឆបោក និងប្រព្រឹត្តបទល្មើសផ្សេងៗ។
របៀបដែលការបោកបញ្ឆោតបែប វិនិយោគក្លែងក្លាយដំណើរការ
- ការទំនាក់ទំនង និងការកសាងទំនុកចិត្ត៖ ជនបោកប្រាស់ចាប់ផ្តើមទំនាក់ទំនងទៅជនរងគ្រោះតាមរយៈបណ្តាញសង្គម កម្មវិធីណាត់ជួប ឬកម្មវិធីផ្ញើសារ ផ្សេងៗដូចជាតាមរយៈ Facebook Messager, Telegram, WhatsApp ឬសារខ្លី SMS ជាដើម។ ជាទូទៅពួកគេធ្វើពុត ជាច្រឡំថាអ្នក ជាមិត្តភក្តិរបស់គេ ឬហាក់ដូចជាធ្លាប់ស្គាល់អ្នក ហើយក៏ចេះតែទាក់ទងមកអ្នកដើម្បីសុំរាប់អាន ឬបង្កើនទំនាក់ទំនងស្នេហាជាដើម។
ជនឆបោកតែងតែប្រើ គណនីដែលបង្ហាញថា ពួកគេមានចំនេះដឹង ជាអ្នកជំនាញ មានទ្រព្យសម្បត្តិ ហើយក៏ប្រើរូបភាពទាក់ទាញ មានរូបភាពស្រីស្អាត ជាដើម្បីទាក់ទងមកកាន់ជនរងគ្រោះ។ ក្នុងដំណាក់កាលដំបូងនេះ ពួកគេទាក់ទងមក គ្រាន់តែសួរសុខទុក្ខ សួរពីរឿងទូទៅធម្មតាៗ ប៉ុន្តែពួកគេនឹងបន្តទំនាក់ទំនងមកអ្នក រហូតដល់ច្រើនថ្ងៃ ច្រើនសប្តាហ៍ មុននឹងណែនាំពីឱកាសវិនិយោគ។
- ការណែនាំពី ឱកាសវិនិយោគ៖ នៅពេលបង្កើតទំនាក់ទំនងបានហើយ ជនបោកប្រាស់ក៏ចាប់ផ្តើមណែនាំអំពី ឱកាសវិនិយោគ ដែលទទួលបានប្រាក់ចំណេញច្រើន ដែលភាគច្រើនការវិនិយោគតាមរយៈរូបិយបណ្ណគ្រីបតូ (Crypto Currency) ឬផ្សារភាគហ៊ុនជាដើម ដោយអះអាងថា ទទួលបានប្រាក់ចំណេញច្រើន ក្នុងរយៈពេលខ្លី។ ដើម្បីពង្រឹងទំនុកចិត្ត ដំបូងពួកគេមិនបង្ខំឱ្យវិនិយោគច្រើនទេ ដោយលើកទឹកចិត្តជនរងគ្រោះឱ្យចាប់ផ្តើមជាមួយការវិនិយោគតិចតួច ជាការសាកល្បង។
- លើកទឹកចិត្តឱ្យវិនិយោគបន្ថែម៖ នៅពេលជនរងគ្រោះឃើញប្រាក់ចំណេញ ដែលមើលទៅដូចជាពិតប្រាកដមែន ជនបោកប្រាស់ជំរុញឱ្យពួកគេបង្កើនការវិនិយោគក្នុងចំនួនកំណត់ណាមួយ ដើម្បីឱ្យត្រូវតាមលក្ខខណ្ឌវិនិយោគ ដែលទទួលបានប្រាក់ចំណេញច្រើន។ ពេលខ្លះឧក្រិដ្ឋជនស្នើឱ្យជនរងគ្រោះខ្ចីប្រាក់ ឬលក់ទ្រព្យសម្បត្តិផ្សេងទៀត យកទៅវិនិយោគក្នុងពេលបន្ទាន់ ឬពេលកំណត់ណាមួយ ដើម្បីធ្វើយ៉ាងណាឱ្យជនរងគ្រោះ ដាក់ប្រាក់វិនិយោគឱ្យបានច្រើន និងឱ្យបានលឿន។
ជនឆបោក បង្កើតគេហទំព័រ ឬកម្មវិធីទូរស័ព្ទក្លែងក្លាយ ដើម្បីបង្ហាញប្រាក់ចំណេញក្លែងក្លាយទៅជនរងគ្រោះ ធ្វើឱ្យជនរងគ្រោះ កាន់តែជឿទុកចិត្ត និងចង់វិនិយោគបន្ថែម។ - ការប្រមូលយកប្រាក់ និងការកាត់ផ្តាច់ទំនាក់ទំនង៖ នៅពេលជនរងគ្រោះព្យាយាមដកប្រាក់របស់ពួកគេ ជនឆបោក ប្រឌិតបញ្ហាឡើង ដើម្បីឱ្យជនរងគ្រោះដាក់បន្ថែមសាច់ប្រាក់ ដូចជាប្រាប់ថា ដើម្បីអាចដកប្រាក់បាន ជនរងគ្រោះត្រូវទូទាត់ថ្លៃ សេវាពន្ធដារ ឬថ្លៃសេវាក្នុងការផ្ទៀងផ្ទាត់អត្តសញ្ញាណគណនីជាដើម ជាលទ្ធផល ទោះជនរងគ្រោះដាក់ប្រាក់បន្ថែម តាមការណែនាំ ពួកគេនៅតែមិនអាចដកប្រាក់បានដដែល។ ពេលឧក្រិដ្ឋជន ទទួលបានប្រាក់ច្រើនពីជនរងគ្រោះ ឬនៅពេលដែលពួកគេដឹងថា ជនរងគ្រោះសង្ស័យ និងលែងចង់វិនិយោគបន្តហើយ ជនឆបោក ក៏ចាប់ផ្តើមកាត់ផ្តាច់ទំនាក់ទំនង ពិបាក ឬក៏មិនអាចទាក់ទងបានតែម្តង។ ជនរងគ្រោះមិនអាចដកប្រាក់ដែលខ្លួនបានវិនិយោគ និងឃើញចំណេញបានទេ ព្រោះប្រាក់ដែលជនរងគ្រោះឃើញចំណេញទាំងនោះ គ្រាន់តែជាតួលេខ នៅលើគេហទំព័រ ឬកម្មវិធីក្លែងក្លាយប៉ុណ្ណោះ ហើយគេហទំព័រ ឬកម្មវិធីទាំងនោះ អាចនឹងលែងដំណើរការបន្ទាប់ពីជនឆបោកកាត់ផ្តាច់ទំនាក់ទំនង ជាមួយជនរងគ្រោះ។ ការវិនិយោគនេះ ជាការវិនិយោគ ដោយប្រើរូបិយបណ្ណគ្រីបតូ ដែលពិបាកក្នុងការតាមដាន ស្វែងរកពីប្រភព និងអត្តសញ្ញាណពិតរបស់អ្នកឆបោកណាស់។
របៀបការពារខ្លួនពីការឆបោកបែបវិនិយោគក្លែងក្លាយ
- ផ្ទៀងផ្ទាត់ប្រភព៖ សូមធ្វើការផ្ទៀងផ្ទាត់អត្តសញ្ញាណបុគ្គលដែលទាក់ទងអ្នកតាមអនឡាញ ជាពិសេសប្រសិនបើពួកគេណែនាំឱកាសវិនិយោគណាមួយ ហើយប្រាប់ថានឹងទទួលបានប្រាក់ចំណេញឆាប់រហ័ស។ ស្រាវជ្រាវពីគេហទំព័រ ឬកម្មវិធីនៃការវិនិយោគនោះ ពីប្រភពផ្លូវការ មុននឹងសម្រេចចិត្តដាក់ប្រាក់។
- ជៀសវាងការចែករំលែកព័ត៌មានហិរញ្ញវត្ថុជាមួយមនុស្សស្គាល់គ្នាតាមអនឡាញ
ទោះបីជាអ្នកយល់ថា អ្នកទុកចិត្តមនុស្សដែលទាក់ទងហើយក៏ដោយ សូមចៀសវាងការចែករំលែកព័ត៌មានហិរញ្ញវត្ថុរបស់អ្នក ឬធ្វើការពិភាក្សាអំពីរឿងហិរញ្ញវត្ថុរបស់អ្នកជាមួយមនុស្សដែលអ្នកទើបតែបានស្គាល់តាមអនឡាញ។ - ប្រយ័ត្នចំពោះការវិនិយោគណាដែលផ្តល់ប្រាក់ចំណេញខ្ពស់ ក្នុងរយៈខ្លី
ត្រូវប្រយ័ត្នចំពោះការប្រាប់ថា អ្នកនឹងទទួលបានប្រាក់ចំណេញខ្ពស់ ក្នុងរយៈពេលខ្លី និងមានហានិភ័យទាប ដែលនេះភាគច្រើនជាអន្ទាក់ ក្នុងការឆបោកប្រាក់។ ប្រសិនបើអ្នកចង់វិនិយោគ សូមធ្វើការវិនិយោគ ជាមួយស្ថាប័នហិរញ្ញវត្ថុដែលមានអាជ្ញាប័ណ្ណត្រឹមត្រូវ ស្របច្បាប់នៅក្នុងប្រទេស ប្រយ័ត្នចំពោះគម្រោងវិនិយោគដែលមិនធ្លាប់ស្គាល់ ឬមិនស្របច្បាប់។ - រាយការណ៍សកម្មភាពគួរឱ្យសង្ស័យ
នៅលើគេហទំព័រ ឬកម្មវិធីផ្ញើសារ ដូចជា Facebook ឬ Telegram ជាដើម សុទ្ធតែមានមុខងារឱ្យអ្នករាយការណ៍ (Report) លើបុគ្គល ក្រុម ឬទំព័រដែលអ្នកសង្ស័យថាមានការឆបោក។ បន្ទាប់ពីរាយការណ៍ វេទិកាទំនាក់ទំនងទាំងនោះ នឹងត្រួតពិនិត្យ ហើយអាចនឹងដកចេញ បុគ្គល ក្រុម ឬទំព័រទាំងនោះចេញបាន។ អ្នកក៏អាចរាយការណ៍ទៅកាន់អាជ្ញាធរទប់ស្កាត់ឧក្រិដ្ឋកម្មតាមប្រព័ន្ធអ៊ីនធឺណិត ក្នុងករណីមានការសង្ស័យពីការឆបោកបានដែរ។ បន្ថែមពីនេះ ការចែករំលែកបទពិសោធរបស់អ្នកអាចជួយអ្នកដទៃឱ្យដឹង និងអាចជៀសផុតពីការឆបោកដែលមានលក្ខណៈស្រដៀងគ្នាបានដែរ។
ការឆបោកបែប Pig-Butchering គឺជាការបោកប្រាស់ដ៏ស្មុគស្មាញ ហើយបច្ចុប្បន្នការឆបោកប្រភេទនេះ បានប្រើបច្ចេកវិទ្យាថ្មីៗ រួមមានបច្ចេកវិទ្យាបញ្ញាសប្បនិមិត្ត (AI) ជាដើម ដើម្បីបង្កើតគណនី (Profile) ដូចជារូបភាព និងវីឌីអូ (Deepfake) បង្កើតសារទំនាក់ទំនងដែលទាក់ទាញ និងកាន់តែលំបាកក្នុងការកំណត់សម្គាល់។ ការឆបោកបែបនេះប្រើរយៈពេលវែងល្មម ដើម្បីកសាងការជឿទុកចិត្តជាមួយជនរងគ្រោះ តាមរយៈការសុំរាប់អាន ទំនាក់ទំនងស្នេហា ជាដើម ដែលធ្វើឱ្យជនរងគ្រោះភាគច្រើន ធ្លាក់ក្នុងអន្ទាក់ ជឿដោយមិនមានការសង្ស័យច្រើន ដែលជាហេតុធ្វើឱ្យពួកគេខាតបង់ប្រាក់កាសជាច្រើន។
សូមប្រយ័ត្នចំពោះការផ្តល់ឱកាសវិនិយោគ ជាមួយនឹងប្រាក់ចំណេញខ្ពស់ ពីមនុស្សដែលទាក់ទងមកអ្នកតាមអនឡាញ ដែលអ្នកមិនធ្លាប់ស្គាល់ពីមុនសោះ។ ការឆបោកតាមអនឡាញ កើតមានឡើងច្រើនទម្រង់ច្រើនរូបភាព ដូច្នេះមានតែការបន្តសិក្សា ស្វែងយល់ជាប្រចាំទេ ដែលអាចជួយការពារខ្លួនអ្នកពីការឆបោក ផ្សេងៗបាន។
ប្រភព៖