Telegram បានប្រកាសថា នឹងផ្តល់អាស័យដ្ឋានអាយភី (IP Address) និងលេខទូរស័ព្ទរបស់អ្នកប្រើប្រាស់ទៅឱ្យអាជ្ញាធរ តាមសំណើផ្លូវច្បាប់ ដើម្បីទប់ស្កាត់សកម្មភាពឧក្រិដ្ឋកម្មលើវេទិការរបស់ខ្លួន ។
“យើងបានបញ្ជាក់យ៉ាងច្បាស់ថា អាស័យដ្ឋាន IP និងលេខទូរស័ព្ទរបស់អ្នកប្រើប្រាស់ដែលរំលោភបំពានគោលនយោបាយរបស់យើង អាចនឹងត្រូវប្រគល់ឱ្យទៅអាជ្ញាធរពាក់ព័ន្ធ ជាការឆ្លើយតបនឹងសំណើផ្លូវច្បាប់ដែលមានភាពត្រឹមត្រូវ” នេះបើយោងតាមការបញ្ជាក់របស់លោក Pavel Durov នាយកប្រតិបត្តិក្រុមហ៊ុន Telegram។
“ប្រសិនបើមានការបញ្ជា ពីតុលាការ ដែលបញ្ជាក់ថាអ្នកជាជនសង្ស័យ ពាក់ព័ន្ធនឹងសកម្មភាពឧក្រិដ្ឋកម្ម ដែលរំលោភលើលក្ខខណ្ឌប្រើប្រាស់របស់ Telegram យើងនឹងធ្វើការពិនិត្យមើលសំណើនោះ ហើយអាចបង្ហាញអាស័យដ្ឋាន IP និងលេខទូរស័ព្ទរបស់អ្នកទៅអាជ្ញាធរពាក់ព័ន្ធ។”
ទិន្នន័យពីការស្នើរសុំព័ត៌មានរបស់អ្នកប្រើប្រាសើទាំងនេះ នឹងត្រូវដាក់ បញ្ចូលក្នុងរបាយការណ៍តម្លាភាព (Transparency Report) របស់ Telegram។
Telegram បានបន្ថែមថា ខ្លួនអាចប្រមូលទិន្នន័យពីអ្នកប្រើប្រាស់ ដូចជា ទិន្នន័យ អាស័យដ្ឋាន IP ទិន្នន័យពាក់ព័ន្ធនឹងឧបករណ៍អ្នកប្រើប្រាស់ ព្រមទាំងប្រវត្តិនៃការផ្លាស់ប្តូរឈ្មោះអ្នកប្រើប្រាស់ជាដើម ក្នុងគោលបំណងទប់ស្កាត់សារឥតប្រយោជន៍ (Spam) នឹងទប់ស្កាត់ការរំលោភបំពានផ្សេងៗ ។
គួររំលឹកថា Telegram ធ្លាប់បានបដិសេធមិនត្រួតពិនិត្យ និងមិនប្រគល់ទិន្នន័យអ្នកប្រើប្រាស់ទៅអាជ្ញាធរ ជាច្រើនឆ្នាំមកហើយ ទោះបីជាមានការស្នើសុំ ឬបញ្ជាពីអាជ្ញាធរក៏ដោយ។
ការផ្លាស់ប្តូរគោលនយោបាយនេះ ធ្វើឡើងបន្ទាប់ពីមានការចាប់ខ្លូនលោក Pavel Durov នាយកប្រតិបត្តិក្រុមហ៊ុន និងជាស្ថាបនិក Telegram នៅប្រទេសបារាំង ដោយ ចោទប្រកាន់ថាក្រុមហ៊ុននេះបានព្រងើយកន្តើយចំពោះឧក្រិដ្ឋកម្មផ្សេងៗ ដែលកំពុងកើតមាននៅលើវេទិការបស់ខ្លួនទាក់ទងនឹង សកម្មភាពខុសច្បាប់ផ្សេងៗ រួមមានការជួញដូរគ្រឿងញៀន រូបភាពអាសអាភាសកុមារ និងការលាងលុយកខ្វក់ជាដើម។
ប្រភព: The Hacker News