ឧក្រិដ្ឋជន ដែលឆបោកនៅអាស៊ីអាគ្នេយ៍កំពុងងាកទៅប្រើប្រាស់បញ្ញាសិប្បនិម្មិត (AI) ការក្លែងវីឌីអូ (deepfakes) និងប្រើកម្មវិធីមេរោគ (Malware) គ្រោះថ្នាក់កាន់តែច្រើនឡើង ដែលធ្វើឱ្យប្រតិបត្តិការ ឆបោកក្នុងរូបភាពវិនិយោគក្លែងក្លាយ (Pig Butchering Scam) របស់ពួកគេកាន់តែមានប្រសិទ្ធភាពខ្ពស់។
របាយការណ៍មួយចេញដោយ ការិយាល័យគ្រឿងញៀន និងឧក្រិដ្ឋកម្មនៃអង្គការសហប្រជាជាតិ (UNODC) បង្ហាញពីរបៀបដែលឧក្រិដ្ឋជន កំពុងរួមបញ្ចូលបច្ចេកវិទ្យាទំនើប ដើម្បីធ្វើឱ្យប្រតិបត្តិការរបស់ពួកគេកាន់តែមានប្រសិទ្ធភាព។ ការឆបោកតាមរយៈការវិនិយោគក្លែងក្លាយនេះ ក្រុមឧក្រិដ្ឋជន ចំណាយពេលច្រើន ទំនាក់ទំនងជនរងគ្រោះដើម្បីកសាងទំនាក់ទំនងល្អ ធ្វើយ៉ាងណាឱ្យជនរងគ្រោះមានទំនុកចិត្ត មុនពេលណែនាំឱ្យជនរងគ្រោះវិនិយោគ។ ឧក្រិដ្ឋជនក៏បានប្រើវិធីបោកប្រាស់ផ្សេងទៀតដែរ ដូចជាតាមរយៈការផ្តល់ឱកាសការងារ (Job Scams) និងការគំរាមកំហែងផ្លូវភេទ (Sextortion) ជាដើម ដែលឧក្រិដ្ឋជនទទួលបានប្រាក់ចំណូលយ៉ាងច្រើន ចេញពីតំបន់អាស៊ីអាគ្នេយ៍។
លើសពីនេះ ឧក្រិដ្ឋជនក៏កំពុងប្រើប្រាស់អ៊ីនធឺណិតតាមផ្កាយរណប Starlink របស់ Elon Musk ដើម្បីដំណើរការប្រតិបត្តិការរបស់ពួកគេ ព្រមជាមួយនឹងការប្រើឧបករណ៍វាយប្រហារ ដែលមានសមត្ថភាពខ្ពស់ ដើម្បីលួចព័ត៌មានអ្នកប្រើប្រាស់នៅលើអ៊ីនធឺណិត និងប្រើកម្មវិធីមេរោគដែលអាចលួចជ្រៀតចូលឧបករណ៍របស់អ្នកប្រើប្រាស់ពីចម្ងាយ (remote access trojans)ផងដែរ។
ឧក្រិដ្ឋជនបានពង្រីកវិសាលភាព នៃការបោកប្រាស់តាមអនឡាញ ដោយប្រតិបត្តិការពួកគេបានរីករាលដាលពីតំបន់អាស៊ីអាគ្នេយ៍ ទៅកាន់តំបន់ផ្សេងទៀតដូចជា នៅមជ្ឈិមបូព៌ា អាមេរិកឡាទីន និងអាហ្វ្រិកខាងលិចផងដែរ។ នៅពេលដែលក្រុមបោកប្រាស់មានកាន់តែច្រើន និងប្រើបច្ចេកទេសកាន់តែទំនើប ការអនុវត្តច្បាប់ក៏ជួបការលំបាកក្នុងការតាមឱ្យទាន់យុទ្ធសាស្ត្រនៃការវាយប្រហារដ៏ស្មុគស្មាញរបស់ពួកគេដែរ ដែលបញ្ហានេះបង្កើតជាក្តីបារម្ភអំពីអនាគតនៃការគ្រប់គ្រងឧក្រិដ្ឋកម្មតាមប្រព័ន្ធអ៊ីនធឺណិតនៅលើពិភពលោកទាំងមូល។
សូមរំលឹកថា ការឆបោកក្នុងទម្រង់វិនិយោគក្លែងក្លាយ ឬ Pig Butchering Scam គឺជារបៀបឆបោកមួយ ដែលបញ្ឆោតជនរងគ្រោះឱ្យវិនិយោគប្រាក់ (ភាគច្រើនតាមរយៈរូបិយវត្ថុគ្រីបតូ – Cryptocurrency) បន្តិចម្តងៗ រហូតដល់ចំនួនច្រើន ជាមួយនឹងក្រុមហ៊ុន ឬស្ថាប័នដែលមើលទៅគួរឱ្យទុកចិត្ត និងមានលក្ខណៈស្របច្បាប់។ ការឆបោកនេះ ធ្វើឱ្យជនរងគ្រោះមើលឃើញថា និងទទួលបានប្រាក់ចំណេញត្រលប់មកវិញច្រើន ក្នុងរយៈពេលខ្លី។ ជនឆបោក តែងតែប្រើរយៈពេលយូរ ក្នុងការក៏សាងទំនាក់ទំនង ជាមួយជនរងគ្រោះ ដើម្បីឱ្យមានការទុកចិត្ត រហូតដល់ព្រមសាកល្បងដាក់ប្រាក់វិនិយោគ។ ក្នុងដំណាក់កាលដំបូងៗ អ្នកឆបោក មិនមានការបង្ខិតបង្ខំ ឬធ្វើសកម្មភាពគួរឱ្យសង្ស័យទេ រហូតដល់ជនរងគ្រោះធ្វើការវិនិយោគ ក្នុងចំនួនទឹកប្រាក់កាន់ច្រើន ទីបំផុត ពួកគេក៏មិនមិនទទួលបាន ឬមិនអាចដកប្រាក់នោះវិញបាន។ ការឆបោកនេះ ត្រូវបានប្រៀបធៀបទៅនឹងការចិញ្ចឹមជ្រូកយកសាច់ (Pig Butchering ) ដោយជនរងគ្រោះប្រៀបបាននឹងសត្វជ្រូក ហើយអ្នកឆបោកប្រៀបនឹងម្ចាស់ ឬអ្នកចិញ្ចឹមជ្រូក។ ម្ចាស់ជ្រូកត្រូវចំណាយពេលយូរចិញ្ចឹមសត្វជ្រូកនោះឱ្យបានធំធាត់ល្អ មុននឹងសម្លាប់យកសាច់។
ការឆបោកក្នុងទម្រង់វិនិយោគក្លែងក្លាយនេះ បានក្លាយជាបញ្ហារីករាលដាលយ៉ាងទូលំទូលាយ បង្កឱ្យមានការបាត់បង់ហិរញ្ញវត្ថុយ៉ាងច្រើនដល់ជនរងគ្រោះនៅទូទាំងពិភពលោក ។ ឧក្រិដ្ឋជនដែលឆបោក តែងតែបាត់ខ្លួនបន្ទាប់ពីប្រមូលបានប្រាក់បានយ៉ាងច្រើនពីជនរងគ្រោះ។
ប្រភព៖ wired.com