ល្បឿន និងវិសាលភាពនៃការរៀបចំសង្គ្រាមដោយ AI របស់យោធាអាមេរិក បង្កការព្រួយបារម្ភថា ការសម្រេចចិត្តដោយមនុស្សអាចត្រូវបានបោះបង់ចោល
ដោយ Robert Booth និង Dan Milmo
ការប្រើប្រាស់ឧបករណ៍ AI ដើម្បីអនុញ្ញាតឲ្យមានការវាយប្រហារលើអ៊ីរ៉ង់ កំពុងបង្ហាញពីសម័យថ្មីនៃការបំផ្ទុះគ្រាប់បែកដែលលឿនជាង “ល្បឿននៃការគិត” តាមការបញ្ជាក់របស់អ្នកជំនាញ ខណៈមានការព្រួយបារម្ភថា អ្នកសម្រេចចិត្តជាមនុស្សអាចត្រូវបានដកចេញពីដំណើរការនេះ។
គំរូ AI Claude របស់ក្រុមហ៊ុន Anthropic រាយការណ៍ថា ត្រូវបានយោធាសហរដ្ឋអាមេរិកប្រើក្នុងការវាយប្រហារជាបន្តបន្ទាប់ ដោយបច្ចេកវិទ្យានេះ “កាត់បន្ថយខ្សែសង្វាក់សម្លាប់ (kill chain)” ដែលមានន័យថា ការដំណើរការពីការកំណត់គោលដៅ រហូតដល់ការអនុម័តផ្លូវច្បាប់ និងការបាញ់វាយប្រហារ ត្រូវបានធ្វើឡើងលឿនជាងមុន។
សហរដ្ឋអាមេរិក និងអ៊ីស្រាអែល ដែលមុននេះបានប្រើ AI ដើម្បីកំណត់គោលដៅនៅក្នុងតំបន់ហ្គាហ្សា បានបើកការវាយប្រហារប្រហែល ៩០០ដង លើគោលដៅក្នុងអ៊ីរ៉ង់ ក្នុងរយៈពេល ១២ ម៉ោងដំបូងប៉ុណ្ណោះ។ ក្នុងការវាយប្រហារនោះ គ្រាប់មីស៊ីលរបស់អ៊ីស្រាអែលបានសម្លាប់ មេដឹកនាំខ្ពស់បំផុតរបស់អ៊ីរ៉ង់ អាយ៉ាតុល្លា អាលី ខាមេណេអ៊ី (Ayatollah Ali Khamenei)។
អ្នកស្រាវជ្រាវវិទ្យាសាស្ត្រដែលសិក្សាផ្នែកនេះបាននិយាយថា AI កំពុងកាត់បន្ថយពេលវេលាដែលត្រូវការសម្រាប់ការរៀបចំការវាយប្រហារដ៏ស្មុគស្មាញ។ បាតុភូតនេះត្រូវបានគេហៅថា “decision compression” (ការបង្រួមដំណើរការសម្រេចចិត្ត) ដែលអ្នកខ្លះខ្លាចថា អ្នកជំនាញយោធា និងអ្នកជំនាញផ្នែកច្បាប់ អាចត្រឹមតែអនុម័តផែនការវាយប្រហារដែលបានបង្កើតដោយម៉ាស៊ីនប៉ុណ្ណោះ។
នៅឆ្នាំ ២០២៤ក្រុមហ៊ុន Anthropic ដែលមានទីតាំងនៅទីក្រុង San Francisco បានដាក់ឲ្យប្រើប្រាស់គំរូ AI របស់ខ្លួននៅក្នុង ក្រសួងសង្គ្រាមសហរដ្ឋអាមេរិក និងអង្គភាពសន្តិសុខជាតិផ្សេងៗ ដើម្បីបង្កើនល្បឿននៃការរៀបចំផែនការសង្គ្រាម។
Claude បានក្លាយជាផ្នែកមួយនៃប្រព័ន្ធដែលបង្កើតឡើងដោយក្រុមហ៊ុនបច្ចេកវិទ្យាសង្គ្រាម Palantir ជាមួយ Pentagon ដើម្បី “ធ្វើឲ្យការវិភាគព័ត៌មានស៊ើបការណ៍កាន់តែមានប្រសិទ្ធភាពខ្លាំង និងជួយដល់មន្រ្តីក្នុងដំណើរការសម្រេចចិត្ត”។
Craig Jones អ្នកបង្រៀនជាន់ខ្ពស់ផ្នែកភូមិសាស្ត្រនយោបាយនៅសាកលវិទ្យាល័យ Newcastle University និងជាអ្នកជំនាញអំពី “kill chains” បាននិយាយថា៖
“ម៉ាស៊ីន AI កំពុងផ្តល់អនុសាសន៍ថាត្រូវវាយគោលដៅណា ដែលនៅពេលខ្លះ លឿនជាងល្បឿននៃការគិតរបស់មនុស្សផងដែរ។ ដូច្នេះអ្នកមានទាំងវិសាលភាព និងល្បឿន។ អ្នកកំពុងធ្វើការវាយប្រហារបែបសម្លាប់គោលដៅ (assassination-style strikes) ក្នុងពេលតែមួយដែលអ្នកកំពុងកាត់ផ្តាច់សមត្ថភាពរបស់រដ្ឋាភិបាលក្នុងការឆ្លើយតបជាមួយមីស៊ីលបាលីស្ទិកអាកាស។ ក្នុងសង្គ្រាមពីមុន វាអាចចំណាយពេលយូរថ្ងៃ ឬសប្តាហ៍។ ប៉ុន្តែឥឡូវនេះ អ្នកអាចធ្វើអ្វីៗទាំងអស់ក្នុងពេលតែមួយ។”
ប្រព័ន្ធ AI ចុងក្រោយអាចវិភាគព័ត៌មានច្រើនយ៉ាងលឿនអំពីគោលដៅដែលអាចវាយប្រហារ ដូចជា វីដេអូពីដ្រូន ការចាប់សញ្ញាទំនាក់ទំនង និងព័ត៌មានស៊ើបការណ៍ពីមនុស្ស។
ប្រព័ន្ធរបស់ Palantir ប្រើ machine learning ដើម្បីកំណត់អាទិភាពគោលដៅ ហើយណែនាំអាវុធដែលគួរប្រើ ដោយគិតគូរអំពីស្តុកអាវុធ និងប្រសិទ្ធភាពក្នុងការវាយគោលដៅស្រដៀងគ្នាក្នុងអតីតកាល។ វាក៏ប្រើ automated reasoning ដើម្បីវាយតម្លៃមូលដ្ឋានច្បាប់សម្រាប់ការវាយប្រហារផងដែរ។
David Leslie សាស្ត្រាចារ្យផ្នែកសីលធម៌ បច្ចេកវិទ្យា និងសង្គម នៅ Queen Mary University of London បាននិយាយថា៖
“នេះគឺជាយុគសម័យបន្ទាប់នៃយុទ្ធសាស្ត្រ និងបច្ចេកវិទ្យាយោធា។”
គាត់ក៏បានព្រមានថា ការពឹងផ្អែកលើ AI អាចបង្កើតអ្វីដែលហៅថា “cognitive off-loading” ដែលមានន័យថា មនុស្សដែលត្រូវសម្រេចចិត្តវាយប្រហារ អាចមានអារម្មណ៍ត្រូវបានកាត់ផ្តាច់ពីផលវិបាករបស់វា ព្រោះការគិតវិភាគភាគច្រើនត្រូវបានធ្វើដោយម៉ាស៊ីនរួចហើយ។
កាលពីថ្ងៃសៅរ៍ មានមនុស្ស ១៦៥ នាក់ (ភាគច្រើនជាកុមារ) ត្រូវបានសម្លាប់ក្នុងការវាយប្រហារដោយមីស៊ីលដែលប៉ះពាល់សាលារៀនមួយនៅភាគខាងត្បូងអ៊ីរ៉ង់ តាមការរាយការណ៍របស់សារព័ត៌មានរដ្ឋ។ ទីតាំងនោះត្រូវបានគេនិយាយថានៅជិតបន្ទាយយោធា ហើយអង្គការសហប្រជាជាតិបានហៅវាថា “ការរំលោភយ៉ាងធ្ងន់ធ្ងរលើច្បាប់មនុស្សធម៌អន្តរជាតិ”។
យោធាសហរដ្ឋអាមេរិកបាននិយាយថា ខ្លួនកំពុងស៊ើបអង្កេតអំពីរបាយការណ៍នេះ។
មិនទាន់មានការបញ្ជាក់ថា អ៊ីរ៉ង់បានបញ្ចូលប្រព័ន្ធ AI អ្វីខ្លះទៅក្នុងប្រព័ន្ធសង្គ្រាមរបស់ខ្លួននោះទេ ប៉ុន្តែអ៊ីរ៉ង់បានអះអាងនៅឆ្នាំ ២០២៥ ថា ខ្លួនក៏បានប្រើ AI ក្នុងប្រព័ន្ធកំណត់គោលដៅមីស៊ីលផងដែរ។ កម្មវិធី AI របស់ខ្លួនដែលត្រូវបានរារាំងដោយទណ្ឌកម្មអន្តរជាតិ ដែលមើលទៅមានសមត្ថភាពទាបជាងខ្លាំង បើប្រៀបធៀបទៅនឹងអំណាច AI ធំៗដូចជា សហរដ្ឋអាមេរិក និងចិន។
នៅថ្ងៃមុនការវាយប្រហារលើអ៊ីរ៉ង់ រដ្ឋបាលសហរដ្ឋអាមេរិកបាននិយាយថា ខ្លួននឹងដក Anthropic ចេញពីប្រព័ន្ធរបស់ខ្លួន បន្ទាប់ពីក្រុមហ៊ុនបានបដិសេធមិនអនុញ្ញាតឲ្យ AI របស់ខ្លួនត្រូវបានប្រើសម្រាប់ អាវុធស្វ័យប្រវត្តិពេញលេញ ឬការតាមដានប្រជាពលរដ្ឋអាមេរិក។
ទោះយ៉ាងណា ប្រព័ន្ធនេះនៅតែត្រូវបានប្រើប្រាស់បន្តរហូតដល់វាត្រូវបានដកចេញទាំងស្រុង។ ខណៈពេលដូចគ្នា ក្រុមហ៊ុនគូប្រជែងរបស់ Anthropic គឺ OpenAI បានចុះកិច្ចព្រមព្រៀងជាមួយ Pentagon ដើម្បីប្រើគំរូ AI របស់ខ្លួនសម្រាប់គោលបំណងយោធា។
David Leslie បាននិយាយថា៖
“អត្ថប្រយោជន៍សំខាន់គឺល្បឿននៃការសម្រេចចិត្ត។ ការរៀបចំផែនការដែលពីមុនអាចចំណាយពេលយូរថ្ងៃ ឬសប្តាហ៍ ឥឡូវនេះអាចធ្វើបានក្នុងរយៈពេលតែប៉ុន្មាននាទី ឬវិនាទី។ ប្រព័ន្ធទាំងនេះបង្កើតជម្រើសជាច្រើនសម្រាប់អ្នកសម្រេចចិត្ត ប៉ុន្តែពេលវេលាដែលពួកគេមានសម្រាប់វាយតម្លៃអនុសាសន៍ទាំងនោះ តូចជាងមុនខ្លាំង។”
លោកស្រី Prerana Joshi អ្នកស្រាវជ្រាវនៅ Royal United Services Institute ដែលជាគ្រឹះស្ថានគិតគូរផ្នែកការពារជាតិ បាននិយាយថា៖
“ការប្រើប្រាស់ AI កំពុងពង្រីកខ្លាំង។ វាត្រូវបានអនុវត្តនៅក្នុងវិស័យការពារជាតិរបស់ប្រទេសជាច្រើន ក្នុងផ្នែកដូចជា ភស្តុភារ ការបណ្តុះបណ្តាល ការគ្រប់គ្រងការសម្រេចចិត្ត និងការថែទាំប្រព័ន្ធ។”
លោកស្រីបានបន្ថែមថា៖
“AI គឺជាបច្ចេកវិទ្យាដែលអាចជួយឲ្យអ្នកសម្រេចចិត្ត និងមនុស្សទាំងអស់នៅក្នុងខ្សែសង្វាក់នោះ បង្កើនផលិតភាព និងប្រសិទ្ធភាពនៃការងាររបស់ពួកគេ។ វាជាវិធីមួយក្នុងការរួមបញ្ចូល និងវិភាគទិន្នន័យបានលឿនជាងមុន ដែលមានប្រយោជន៍សម្រាប់អ្នកសម្រេចចិត្ត។”
សូមបញ្ជាក់ផងដែរថាដោយសារមានការដក ក្រុមហ៊ុន Anthropic ចេញ ហើយមានការចូលរួមពីក្រុមហ៊ុន Open AI នេះ អ្នកប្រើប្រាស់ Chat GPT នៅទូទាំងពិភពលោកប្រមាណជា ២.៥ លាននាក់ បានធ្វើយុទ្ធការឈប់ប្រើសេវារបស់ក្រុមហ៊ុននេះ ដោយមើលឃើញពីហានិភ័យ នៃការរំលោភបំពានសិទិ្ធមនុស្សធ្ងន់ធ្ងរ។
ប្រភព៖