គួររំលឹកថា Signal តម្រូវឱ្យអ្នកប្រើប្រាស់ផ្តល់លេខទូរស័ព្ទដើម្បីចុះឈ្មោះប្រើកម្មវិធីនេះ នឹងយកលេខទូរស័ព្ទនោះ ធ្វើជាអត្តសញ្ញាណរបស់ពួកគេនាពេលកន្លងមក។ ទោះបីជាកម្មវិធីនេះ ត្រូវបានទទួលស្គាល់ថា ជាកម្មវិធីផ្ញើសារមួយដែលមានសុវត្ថិភាពខ្ពស់ក៏ដោយ ក៏អ្នកប្រើប្រាស់ជាច្រើននៅតែមានកង្វល់ ពីការបង្ហាញលេខទូស័ព្ទផ្ទាល់ខ្លួន ទៅអ្នកផ្សេងដែលមានក្នុងបញ្ជីទំនាក់ទំនង Signal របស់ពួកគេ។
សំណួរដែលតែងតែចោទសួរនោះគឺ៖ ហេតុអ្វីបានជាពួកគេត្រូវតែផ្តល់លេខទូរស័ព្ទ ទៅនរណាម្នាក់ ដើម្បីអាចទំនាក់ទំនងតាមកម្មវិធីសុវត្ថិភាពនេះ? អ្នកប្រើប្រាស់មួយចំនួន មិនសប្បាយចិត្តក្នុងការផ្តល់ទូរស័ព្ទផ្ទាល់ខ្លួន ទៅកាន់មនុស្សដែលពួកគេមិនធ្លាប់ស្គាល់នោះទេ។
ក្រុមការងាររបស់ Signal បានធ្វើការងារជាច្រើន ដើម្បីដោះស្រាយបញ្ហានេះ ហើយទីបំផុតពួកគេ រកឃើញដំណោះស្រាយ ដោយអនុញ្ញាតឱ្យអ្នកប្រើប្រាស់លាក់លេខទូរស័ព្ទរបស់ពួកគេ និងបង្ហាញនូវឈ្មោះប្រើប្រាស់ ឬឈ្មោះតំណាង (username) ជំនួសវិញ។
ខាងក្រោមនេះ ជាអ្វីដែលអ្នកប្រើប្រាស់ទទួលបាននៅពេលបន្ទាប់ពី ធ្វើបច្ចុប្បន្នភាពកម្មវិធី Signal។
- អ្នកអាចលាក់លេខទូរស័ព្ទអ្នកពីអ្នកគ្រប់គ្នានៅក្នុង Signal
នៅពេលដែលអ្នកធ្វើបច្ចុប្បន្នភាពកម្មវិធី Signal អ្នកនឹងទទួលបានមុខងារថ្មី ដែលដែលអាចឱ្យអ្នកលាក់លេខទូរស័ព្ទបាន។ ប៉ន្តែសូមចាំថា អ្នកដែលបានរក្សាទុកលេខទូរស័ព្ទរបស់អ្នក នៅក្នុងបញ្ជីទំនាក់ទំនងក្នុងទូរស័ព្ទពួកគេ នៅតែអាចមើលឃើញលេខទូរស័ព្ទអ្នកដដែល នេះក៏ព្រោះតែពួកគេបានស្គាល់លេខទូរស័ព្ទអ្នករួចទៅហើយ។ - អ្នកអាចកំណត់មិនឱ្យអ្នកផ្សេងអាចស្វែងរកអ្នកឃើញនៅក្នុង Signal តាមរយៈលេខទូរស័ព្ទរបស់អ្នក
នៅពេលដែលអ្នកបានបង្កើតឈ្មោះតំណាង (username) អ្នកអាចកំណត់ មិនឱ្យអ្នកផ្សេងអាចស្វែងរកអ្នកឃើញ នៅក្នុង Signal តាមលេខទូរស័ព្ទរបស់អ្នកបាន ទោះបីជាពួកគេបានរក្សាទុកលេខនោះនៅក្នុង បញ្ជីទំនាក់ទំនងក្នុងទូរស័ព្ទពួកគេក៏ដោយ។ ពួកគេនឹងមិនដឹងថា អ្នកប្រើលេខទូរស័ព្ទនោះ ដើម្បីចុះឈ្មោះប្រើ Signal ទេ។
- អ្នកអាចទាក់ទងជាមួយអ្នកណាក៏បានតាម Signal ដោយមិនចាំបាច់ប្រាប់លេខទូរស័ព្ទទៅពួកគេ
ឥឡូវនេះ អ្នកអាចបង្កើតឈ្មោះតំណាង (username) ហើយប្រាប់ឈ្មោះនោះទៅពួកគេ ដើម្បីឱ្យពួកគេអាចស្វែងរកអ្នកនៅក្នុង Signal ដោយមិនចាំប្រាប់លេខទូរស័ព្ទដូចមុនទេ។ អ្នកក៏អាចផ្ញើ តំណរភ្ជាប់់ (link) ឬ QR Code ទៅកាន់អ្នកដែលអ្នកចង់ទាក់ទង ពួកគេគ្រាន់តែចុចលើតំណភ្ជាប់នោះ ឬធ្វើការស្តេន QR Code របស់អ្នក នោះពួកគេនឹងអាចភ្ជាប់ទំនាក់ទំនងជាមួយអ្នកបានហើយ។
រូបភាព៖ signal.org
បច្ចុប្បន្ន មុខងារថ្មីនេះ កំពុងដាក់ឱ្យប្រើសាកល្បង (beta version) ដោយរំពឹងថាអ្នកប្រើប្រាស់គ្រប់គ្នា អាចនឹងទទួលបានមុខងារថ្មីនេះក្នុងពេលដ៏ខ្លីខាងមុខ។ ដើម្បីទទួលបានមុខងារថ្មីនេះ អ្នកត្រូវតែធ្វើបច្ចុប្បន្នភាពកម្មវិធី Signal ទៅកាន់ជំនាន់ថ្មីបំផុតរបស់កម្មវិធីនេះ។
របៀប បង្កើតឈ្មោះតំណាង ឬ username
ចូលទៅកាន់ profile របស់អ្នក ដោយចុចលើ រូប profile អ្នកចំនួន២ដង នោះអ្នកនឹងឃើញ @ Username នៅខាងក្រោម > ចុចលើ @username ហើយដាក់ឈ្មោះដែលអ្នកពេញចិត្ត។
ចំណាំ ឈ្មោះនេះជាឈ្មោះដែលជំនួសឱ្យលេខទូរស័ព្ទអ្នក អ្នកអាចប្រាប់ ឬផ្ញើឈ្មោះនេះទៅអ្នកដទៃបាន។ អ្នកក៏អាចដូរឈ្មោះនេះបានដែរ។
រូបភាព៖ signal.org
របៀបលាក់លេខទូរស័ព្ទរបស់អ្នក
- ចូលទៅកាន់ Settings > Privacy > Phone number ត្រង់ Who can see my phone number > ជ្រើសរើសយក Nobody
របៀបកំណត់មិនឱ្យអ្នកផ្សេងអាចស្វែងរកអ្នកឃើញតាមរយៈលេខទូរស័ព្ទរបស់អ្នក
- ចូលទៅកាន់ Settings > Privacy > Phone number ត្រង់ Who can find me by number > ជ្រើសរើសពាក្យ Nobody
ប្រភព៖