DeepSeek ជាកម្មវិធី AI ដែលបង្កើតឡើងដោយក្រុមហ៊ុនថ្មីមួយរបស់ចិន ដែលកំពុងទទួលបានការចាប់អារម្មណ៍ខ្លាំងក្នុងរយៈពេលប៉ុន្មានថ្ងៃមកនេះ បានបិទឈប់ទទួលការចុះឈ្មោះប្រើកម្មវិធីបណ្តោះអាសន្ន ដោយសារកំពុងទទួលរងការវាយប្រហារ។
ក្រុមហ៊ុនបានប្រកាសថា ដោយសារតែរងការវាយប្រហារទ្រង់ទ្រាយធំមកលើ DeepSeek សេវាកម្មនេះបានផ្អាកការចុះឈ្មោះជាបណ្តោះអាសន្នដើម្បីអាចធានាបានថា កម្មវិធីបញ្ញាសិប្បនិម្មិតនេះ នូវតែអាចដំណើរការបានសម្រាប់អ្នកប្រើប្រាស់ដែលបានចុះឈ្មោះ និងកំពុងប្រើកម្មវិធីនេះ។
គួររំលឹកថា DeepSeek ជាកម្មវិធីបញ្ញាសិប្បនិម្មិតថ្មី បង្កើតឡើងដោយក្រុមហ៊ុនធុរកិច្ចរបស់ចិន ក្នុងទីក្រុងហាងជូវ។ AI ថ្មីនេះ ទទួលបានការចាប់អារម្មណ៍យ៉ាងខ្លាំង នឹងឈរនៅក្នុងលេខរៀងជួរមុខលើ ChatGPT របស់សហរដ្ឋអាមេរិកទៅទៀត នៅក្នុងតារាងបញ្ជីកម្មវិធីដែលមានការពេញនិយមបំផុត របស់ក្រុមហ៊ុនអេបផល (App Store) នៅក្នុងសប្តាហ៍នេះ។
DeepSeek បានទាក់ទាញការចាប់អារម្មណ៍ខ្លាំង ដោយសារតែក្រុមហ៊ុននេះ អាចបង្កើតកម្មវិធីបញ្ញាសិប្បនិម្មិតដែលទំនើប មានសមត្ថភាពខ្ពស់ អាចប្រកួតប្រជែងជាមួយនឹងកម្មវិធីបញ្ហាសិប្បនិម្មិតល្បីផ្សេងៗទៀត ដូចជា កម្មវិធី ChatGPT ជាដើម ជាមួយនឹងការចំណាយយ៉ាងតិច បើប្រៀបធៀបនឹងកម្មវិធី AI ល្បីៗរបស់សហរដ្ឋអាមេរិក។ ក្នុងខែធ្នូ ឆ្នាំ ២០២៤, DeepSeek បានចេញកម្មវិធីជំនាន់ទី៣ (DeepSeek-V3) ដែលជាប្រភេទ AI អាចផលិតមាតិកាថ្មី (Generative AI Model) ដែលមាន ៦៧១ ពាន់លាន ប៉ារ៉ាមែតទ័រ (Parameters) បណ្ដុះបណ្ដាលក្នុងរយៈពេលប្រមាណ ៥៥ថ្ងៃ ចំណាយអស់ថ្លៃដើមប្រមាណ ៥.៥ លានដុល្លា ប្រៀបធៀបទៅនឹងថវិកា ១០០លានដុល្លា ដែលត្រូវប្រើសម្រាប់ចំណាយលើ AI របស់សហរដ្ឋអាមេរិក។
ជាមួយនឹងជោគជ័យផ្នែកបច្ចេកវិទ្យា កម្មវិធីបញ្ញាសិប្បនិម្មិត AI ថ្មីរបស់ចិននេះ ក៏ទទួលរងនូវការរិះគន់មួយចំនួនទាក់ទងនឹងការឃ្លាំមើល តាមដានតាមដានអ្នកប្រើប្រាស់ ការមិនឆ្លើយតបលើសំណួរទាក់ទងនឹងប្រធានបទ កនៃព្រឹត្តិការណ៍បាតុកម្មនៅទីលានធានអាន (Tiananmen) បញ្ហាតៃវ៉ាន់ និងបញ្ហារបស់ជនជាតិដើមភាគតិច អ៊ុយហ្គ័រ (Uyghurs) នៅប្រទេសចិនជាដើម។ល។ បញ្ហាសុវត្ថិភាពឯកជន ក៏ត្រូវបានលើកឡើងដែរ ដោយសារទិន្នន័យរបស់អ្នកប្រើប្រាស់ត្រូវបានរក្សាទុកក្នុងម៉ាស៊ីនមេ ដែលមានទីតាំងក្នុងប្រទេសចិន។
ប្រភព៖ thehackernews.com, www.pbs.org, wikipedia.org