រូបភាព៖ signal.org
កាលពីថ្ងៃទី១១ ខែវិច្ឆិកា ថ្មីៗនេះ Signal បានដាក់ឱ្យប្រើនូវមុខងារថ្មីមួយ ដែលមានឈ្មោះថា Call Link ដែលអនុញ្ញាតឱ្យអ្នកប្រើប្រាស់កម្មវិធីនេះ អាចចូលរួមប្រជុំដោយគ្រាន់តែចុចលើតំណភ្ជាប់ (Link) ដោយមិនចាំបាច់បង្កើតក្រុម (Signal Group) ដូចពីមុនទេ។
វីឌីអូខល ឬការប្រជុំតាមអនឡាញ វាជាមិនមែនជារឿងថ្មីទេ នៅពេលដែលរបៀបនៃការទំនាក់ទំនង និងធ្វើការតាមអនឡាញវាជារឿងធម្មតាទៅហើយ ប៉ុន្តែបញ្ហានៃការរំលោភលើឯកជនភាព វាក៏ក្លាយជាបញ្ហាដ៏ធំដែរ។ Signal បង្កើតមុខងារថ្មីនេះ ដើម្បីផ្តល់កន្លែងឯកជនមួយ សម្រាប់ទំនាក់ទំនងអ្នកប្រើប្រាស់របស់ខ្លួន។
កន្លងមក ដើម្បីអាចធ្វើការខលជាក្រុមបាន អ្នកប្រើប្រាស់ត្រូវមានក្រុម ឬបង្កើតក្រុមនៅក្នុងកម្មវិធី Signal ជាមុនសិន។ តាមរយៈមុខងារ Call Link ថ្មីនេះ អ្នកអាចបង្កើតតំណភ្ជាប់ (Link) យ៉ាងឆាប់រហ័ស និងងាយស្រួល ដែលអ្នកប្រើប្រាស់ Signal ណាម្នាក់ក៏អាចចូលរួមការខល ឬប្រជុំជាក្រុមបានដោយគ្រាន់តែចុចលើតំណភ្ជាប់នោះ។
មុខងាររបស់ Call Link:
- ចំនួនសមាជិក ដែលអាចចូលរួមការខលជាក្រុមបានចំនួន៥០នាក់។
- មានមុខងារអនុញ្ញាត ឬមិនអនុញ្ញាតឱ្យសមាជិកណាម្នាក់ចូលរួមពីអ្នកបង្កើតតំណភ្ជាប់ (Admin)។
- Admin ក៏អាចដកសមាជិកដែលបានចូលរួមខល ចេញ និងបិទ (Block) មិនឱ្យគេចូលរួមម្តងទៀតបាន។
- តំណភ្ជាប់ដែលបានបង្កើត អាចប្រើឡើងវិញបាន ផ្តល់ភាពងាយស្រួលប្រសិនបើអ្នកមានការប្រជុំជាទៀងទាត់ជាមួយក្រុមការងារ មិនចាំបាច់បង្កើតតំណភ្ជាប់សម្រាប់ការប្រជុំថ្មីរាល់ពេល។
របៀបបង្កើត Call Link
- លើកុំព្យូទ័រ៖ នៅផ្នែកខាងឆ្វេងបង្អស់ ចុចលើនិមិត្តសញ្ញា Calls > ចុចពាក្យ Create a Call Link
- លើទូរស័ព្ទ Android៖ ស្វែងរកនិមិត្តសញ្ញា Calls នៅផ្នែកខាងក្រោម > ចុចពាក្យ Create a Call Link
អ្វីដែលអ្នកគួរធ្វើ
- ដើម្បីទទួលបានមុខងារថ្មី ត្រូវប្រាកដថា អ្នកបានធ្វើបច្ចុប្បន្នភាពកម្មវិធី Signal របស់អ្នក។
- កម្មវិធី Signal មានមុខងារសុវត្ថិភាពដែលគេហៅថា end-to-end encryption ដោយស្វ័យប្រវត្តិ ប៉ុន្តែចំណុចសំខាន់គឺ សារសន្ទនារបស់អ្នក នឹងស្ថិតនៅក្នុងដៃរបស់ដៃគូ សន្ទនាអ្នក ដូច្នេះអ្នកត្រូវប្រាកដថា មនុស្សដែលអ្នកទាក់ទងតាម Signal ជាមនុស្សដែលអាចទុកចិត្តបាន។ យើងណែនាំឱ្យបើកមុខងារលុបសារដោយស្វ័យប្រវត្តិ ក្នុងរយៈពេលកំណត់ណាមួយ។
- សូមប្រុងប្រយ័ត្នចំពោះការចែករំលែកតំណភ្ជាប់សម្រាប់ប្រជុំ និងសូមបើកមុខងារ ដែលតម្រូវឱ្យអ្នកពិនិត្យ មុននឹងអនុញ្ញាតឱ្យសមាជិកចូលរួមប្រជុំ (Require admin to approve = ON) ។
ប្រភព៖ signal.org, freedom.press