Photo by Sajad Nori on Unsplash
អង្គការ និងអ្នកជំនាញបច្ចេកវិទ្យាចំនួន80 បានសរសេរទៅកាន់រដ្ឋមន្ត្រីក្រសួងបច្ចេកវិទ្យា Chloe Smith ដោយជំរុញឱ្យមានការគិតឡើងវិញជុំវិញបញ្ហាច្បាប់មួយនេះ។
Apple បានប្រាប់ BBCថា ច្បាប់នេះគួរតែត្រូវបានកែប្រែដើម្បីការពារបច្ចេកវិទ្យាកូដនីយកម្ម ឬអ៊ីនគ្រីបសិន។ រដ្ឋាភិបាលនិយាយថា ក្រុមហ៊ុននានាត្រូវតែទប់ស្កាត់ការរំលោភបំពានលើកុមារ នៅលើបណ្តាញរបស់ពួកគេ។
End-to-end encryption(E2EE) គឺជាបច្ចេកវិទ្យាសុវត្ថិភាពដែលធ្វើកូដនីយកម្ម ឬអ៊ីនគ្រីបរាល់មាតិកានៅលើអ៊ីនធឺណិត។ មុខងារនេះ អាចធានាថា គ្មានជនផ្សេង ឬជនទី៣ ក្រៅពីអ្នកផ្ញើសារ និងអ្នកទទួលសារអាចបើកមើល ឬអានសារនោះបានទេ សូម្បីតែក្រុមហ៊ុនដែលបង្កើតកម្មវិធី ឬភ្ញាក់ងាររដ្ឋាភិបាលក៏មិនអាចបើកមើលសារនោះបានដែរ។
ប៉ូលីសរដ្ឋាភិបាល និងអង្គការសប្បុរសធម៌ការពារកុមារ ដែលមានកេរ្តិ៍ឈ្មោះមួយចំនួនបាននិយាយថាកម្មវិធីដូចជា WhatsApp និង iMessage របស់ Apple បានរារាំងការអនុវត្តច្បាប់ និងក្រុមហ៊ុនខ្លួនឯងពីការកំណត់អត្ត
សញ្ញាណ ការចែករំលែកមាតិកា ដែលមានភាពរំលោភបំពានផ្លូវភេទកុមារ។ ប៉ុន្តែនៅក្នុងសេចក្តីថ្លែងការណ៍មួយ Apple បាននិយាយថា “(មុខងារកូដនីយកម្ម End-to-End Encryption) មានសមត្ថភាពខ្ពស់ និងមានសារសំខាន់ក្នុងការ ការពារឯកជនភាពរបស់អ្នកសារព័ត៌មាន សកម្មជនសិទ្ធិមនុស្ស និងអ្នកការទូតជាដើម។
“វាក៏ជួយពលរដ្ឋ ក្នុងការការពារខ្លួនពីការឃ្លាំមើល ការលួចអត្តសញ្ញាណ ការក្លែងបន្លំ និងការបំពានទិន្នន័យផងដែរ។ សុវត្ថិភាពលើប្រព័ន្ធអនឡាញ (Online Safety Bill) បង្កការគំរាមកំហែងយ៉ាងធ្ងន់ធ្ងរ ដល់ការការពារនេះ ហើយអាចធ្វើឱ្យពលរដ្ឋចក្រភពអង់គ្លេស ប្រឈមនឹងហានិភ័យកាន់តែច្រើន។
“Apple ជំរុញឱ្យរដ្ឋាភិបាល ធ្វើវិសោធនកម្មច្បាប់នេះ ដើម្បីការពារការមុខងារសុវត្ថិភាព E2EE ដើម្បីជាប្រយោជន៍ សម្រាប់ទាំងអស់គ្នា”។ ប៉ុន្តែរដ្ឋាភិបាលបានប្រាប់ BBCថា ”ក្រុមហ៊ុនអាចប្រើមុខងារ(E2EE) នេះបាន ប្រសិនបើពួកគេអាចទប់ស្កាត់ការរំលោភផ្លូវភេទកុមារដ៏គួរឱ្យស្អប់ខ្ពើម នៅលើបណ្តាញរបស់ពួកគេបាន។
Signal និង WhatsApp បានប្រាប់ BBC ថាពួកគេនឹងបដិសេធក្នុងការធ្វើឱ្យឯកជនភាពនៃកម្មវិធីរបស់ពួកគេភាពទន់ខ្សោយ។
លិខិតដែលចុះហត្ថលេខាដោយអង្គការសង្គមស៊ីវិលជាតិ និងអន្តរជាតិជាង 80ស្ថាប័ន បានបញ្ជាក់ថា “ចក្រភពអង់គ្លេសអាចនឹងក្លាយជាប្រទេសប្រជាធិបតេយ្យសេរីដំបូងគេ ដែលទាមទារឱ្យមានការស្កេនជាប្រចាំនូវសាររបស់ប្រជាជន រួមទាំងការជជែកដែលត្រូវបានធានាដោយបច្ចេកវិទ្យាអ៊ីនគ្រីបសិន។
អ្នករិះគន់និយាយថា នេះនឹងធ្វើឲ្យប៉ះពាល់ដល់ភាពឯកជននៃសារជាមូលដ្ឋាន។