ស្របពេលដែលសេវាហិរញ្ញវត្ថុឌីជីថលរីកចំរើនយ៉ាងឆាប់រហ័សនៅក្នុងកម្ពុជា កាលពីដើមខែមករា ឆ្នាំ២០២៦នេះ ធនាគារជាតិនៃកម្ពុជា (NBC) បានចេញគោលការណ៍ណែនាំ ស្តីពីការគ្រប់គ្រងហានិភ័យតាមប្រព័ន្ធបច្ចេកវិទ្យា និងសាយប័រ (Technology and Cyber Risk Management Guidelines – TCRMG) ដើម្បីធានាសុវត្ថិភាព ស្ថិរភាព និងភាពធន់នៃប្រព័ន្ធហិរញ្ញវត្ថុនៅកម្ពុជា។
គោលការណ៍ណែនាំថ្មីនេះ ឆ្លុះបញ្ចាំងពីការវិវត្តន៍នៃការគំរាមកំហែងតាមអ៊ីនធឺណិត ការកើនឡើងនៃការប្រើប្រាស់បច្ចេកវិទ្យាថ្មីៗ និងការពឹងផ្អែកកាន់តែខ្លាំងនៃការប្រើសេវាហិរញ្ញវត្ថុឌីជីថល ដូចជាសេវាធនាគារចល័ត (mobile banking) សេវាធនាគារតាមអ៊ីនធឺណិត (internet banking) កាបូបអេឡិចត្រូនិក (e-wallets) និងការទូទាត់តាមប្រព័ន្ធអេឡិចត្រូនិក។ ដោយគ្រឹះស្ថានហិរញ្ញវត្ថុ ប្រើប្រាស់បច្ចេកវិទ្យាថ្មីៗ ដើម្បីបង្កើនប្រសិទ្ធភាព និងធ្វើឱ្យមានងាយស្រួលដល់អតិថិជន ពួកគេក៏ប្រឈម នឹងហានិភ័យតាមអ៊ីនធឺណិត និងភាពងាយរងគ្រោះផងដែរ។
សេចក្តីណែនាំរបស់ ធនាគារជាតិនេះ ផ្តល់ជូនធនាគារ និងស្ថាប័នហិរញ្ញវត្ថុនូវគោលការណ៍ និងវិធានអនុវត្តជាក់ស្តែង ដើម្បីគ្រប់គ្រងហានិភ័យបច្ចេកវិទ្យា និងសាយប័រប្រកបដោយប្រសិទ្ធភាព។ គោលការណ៍នេះ កំណត់ភាពចាំបាច់លើអភិបាលកិច្ចសន្តិសុខសាយប័រ ការការពារទិន្នន័យ ការធ្វើប្រព័ន្ធអាចទុកចិត្តបាន និងការឆ្លើយតបចំពោះឧប្បត្តិហេតុ ដើម្បីធានាថាបច្ចេកវិទ្យាថ្មីៗ ដូចជាកុំព្យូទ័រក្លោដ បញ្ញាសិប្បនិម្មិត និងថ្នាលទូទាត់ឌីជីថល ត្រូវបានដាក់ឱ្យប្រើប្រកបដោយសុវត្ថិភាព។
សេចក្ដីណែនាំនេះ មានគោលបំណងការពារអតិថិជន បង្កើនទំនុកចិត្តលើសេវាហិរញ្ញវត្ថុឌីជីថល និងលើកកម្ពស់ប្រព័ន្ធអេកូឡូស៊ីហិរញ្ញវត្ថុឌីជីថលឱ្យមានសុវត្ថិភាព និងនិរន្តរភាពនៅកម្ពុជា។ សេចក្ដីណែនាំនេះក៏ពង្រឹងគណនេយ្យភាពនៅថ្នាក់ក្រុមប្រឹក្សាភិបាល និងថ្នាក់គ្រប់គ្រងជាន់ខ្ពស់ ដោយធានាថាគ្រឹះស្ថានហិរញ្ញវត្ថុ ត្រូវទទួលខុសត្រូវប្រកបភាពច្បាស់លាស់ លើការគ្រប់គ្រងហានិភ័យបច្ចេកវិទ្យា និងអ៊ីនធឺណិត។
ប្រភព៖ ធនាគារជាតិនៃកម្ពុជា